မိန်းမ မဆန်ရေငါ

မင်း 

မင်းမက်မောရေ-

အရောင်တလက်လက်နဲ. မျက်လုံး

မည်းနက်နိန်ရေ ကေသာဆံပင်

တီတီတာတာ ချိုသာရေစကားသံ

ညင်သာလွန်းရေ ခြီလှမ်း

ချစ်ဖို.ကောင်းရေ အပြုံးချို

သနပ်ခါးနဲ. လှပနိန်ရေ ပါးပြင်

မိန်းမဆန်ရေ အိနြေ္ဒချေတိ

အပြစ်ကင်းရေ အလှ

မညင်းသီးမှည်.ပိုင် ၀င်းဝါနန်ရေ အသားအရေ

ငါတစ်ခုလဲ မပိုင်ဆိုင်ကာမင်း။  

ငါပိုင်ဆိုင်စွာတိက မင်းမနှစ်သက်ဆုံးအရာတိဖြစ်နိန်ရေ-

အရောင်တလက်လက်နဲ. မျက်လုံးလဲမရှိ။ ချိုချိုသာသာလဲ စကားမပြောတတ်။

လမ်းမှာမြင်ရေ ကျောက်ခဲတောင် ငါ.ပါးမှာ အီးအီးချမ်းချမ်း မနိန်ရ။ 

ခလုံးကျောက်လို.လားရေ။ အလှမ်းကြီးလှမ်းတတ်တေ ခြီလှမ်းတိရှိရေ။

မိန်းမမဆန် ဟန်ဆောင်ခြင်းမပါရေ အားရပါးရ ရယ်တတ်တေ အကျင်.တိရှိရေ။

ရခိုင်သူမတိုင်းသနပ်ခါးနဲ. လှကတ်ကေ.လေ ငါနဲ.မှသနပ်ခါး လူးလိုက်ကေ လုံးဝကြည်.လို.မကောင်းဆိုရေ မှတ်ချက်တိကို အားရ၀မ်းသာရဖူးရေ။ 

စကားပြောကေ.လဲ အော်ပနာပြောတတ်တေ။

ဟာသာပြောတတ်ရေ ညဏ်တိရှိနိန်ရေ။ သပြေသီးမှည်.နဲ. နင်လားငါလားဆိုရေပိုင် အသားအရေနဲငါ။

အဆိုးဆုံးကတော. မင်းအမုန်းဆုံး  ဖြူစင်ရေငါ.မေတ္တာတိက မင်းတွက် ငါ.နှလုံးသားမှာ ပြည်.နက်နိန်ရေကာ။ မင်းငါလေ ငါ.ရုပ်အကျည်းတန်း အရုပ်ဆိုးလို. တစ်ခါလဲစိတ်မညစ်ဖူး (မင်းနဲ.မတွီ.ခင်အချိန်ထိ)

မင်းနဲ.တွီ.ပြီးမှ -

မိန်းမဆန်ချင်လာရေ။ သနပ်ခါးတိ လှတပတ နိန်ချင်လာရေ။

ဂျိမ်းဘောင်းဘီ တီချပ်နဲရာ နိန်ခရေ လူတစ်ယောက်က အရာမမချေတိပိုင် ဂါဝန်တိကို ၀တ်ချင်လာရေ။

အမှုအရာတိ ညင်ညင်သာသာဖြစ်ချင်လာရေမင်း။ စကားပြောကေ အသာချေ ပြောဖို.ကြိုးစားလာရေ။

လှပရေ အပြုံးတိကို ပိုင်ဆိုင်ချင်လာရေ။ ယကေ.လေ ငါ.အကျင်.ကို ငါမပြောင်းနိုင်သိ။

သူငယ်ချင်းတိနဲ.တွီ.တိုင်း ဇာကဇာကထွက်လာရေမသိ ဟာသတိမရပ်မနားပြောမိရေ။

မင်းပျော်ဖို.ဆိုကေ ငါလဲ လူရွင်တော် ဖြစ်ကေ.လေ ဖြစ်ရ မင်းအတွက်လုပ်ပီးချင်မိရေ။

မင်းအနားမှာလေ ထွန်းလင်းနိန်ရေ လမင်းမဟုတ်ကေတောင် မမှိတ်မသုန်နဲ. ထာဝရရပ်တည်ပီးနိုင်ရေ ကြယ်တပွင်.အဖြစ်ရပ်တည်ချင်ရေ။

မင်းဘ၀တွက် ဇာတ်ဆောင်မဟုတ်ကေတောင် ဇာတ်ရံတစ်ယောက်အဖြစ်ရှိနိန်ချင်ရေ ။

မင်းအနားမှာ အမြဲတမ်းရှိနိန်ချင်မိရေ ငါ.စိတ်။

မိန်းမဆန်ရေ တနိန်.မှာ မင်းက တစ်ခြားတစ်ယောက်ကို ရင်ထဲမှာ ထည်.ပနာ။

မိန်းမဆန်ရစွာ ငါ.တွက် အဓိပါယ်မရှိကာမင်း။

မင်းတစ်ယောက်ကို သတိရမိပါရေ

အချစ်ဦးဆိုစွာ အသည်းကွဲဖို.တွက် ဖန်တီးပီးလိုက်ခြင်းရာဖြစ်တေ။ " အချစ် " မရှိကေ.လေ မနိန်နိုင် ရှိပြန်ကေ.လေ ပူနိန်ရရေ။ ယင်းအပူကိုလဲ ပူလောင်မှန်းသိကတ်ကေလေ. လူတိုင်းမက်မက်မောမော တောင်.တကတ်တေ။  

လူတိုင်း အချစ်ဆိုရေ အရာဝတ္ထုနဲ. ဇာသူတစ်ယောက်ကင်းနိုင်လေ။ ငါလဲတစ်ချိန်က ရူးသွပ်ဖူးပါရေဝေ မင်းတစ်ယောက်ကိုလေ။ သူငယ်ချင်းတိက ငါ.အချစ်က မင်းနဲ.မထိုက်တန်လို.ပြောကတ်တေ။ နှလုံးသားဆိုမှတော. မျက်လုံးပါဖို.လား စိုင်းစားဆုံးဖြတ်နိုင်ရေ ဦးနှောက်ပါဖို.လား။ ယင်းနဲ.လို.ရာလူတိုင်း ကိုယ်.ကိုပြန်မချစ်နိုင်ရေလူ ကိုယ်.ကိုချန်ထားပခဖို. လူကိုစီ ချစ်လားမိကတ်တေမလား။

ငါလေ မင်းကိုချစ်မိခလို. ဒေကုထက်ထိ နောင်တ တစ်ခါလဲမရဖူးသိ။

ငါမင်းကို နောင်တရဖို.ချစ်ခစွာမဟုတ်။ နောက်တစ်ခု ထပ်ပြောလိုက်မယ်မင်း။ မင်းမိန်.ခိုင်းတိုင်း မိန်.လားရလောက်အောင် ငါ.နှလုံးးသားက တရားသူကြီးပါးက ဆုံးဖြတ်ချက်ကို စောင်.မျော်နိန်ရေ တရားခံလဲမဟုတ်။ ဒေစာတိကိုလဲ ငါရွီးကောင်းတိုင်း ရွီးနိန်စွာမဟုတ်။ ငါ.ရင်ထဲကထွက်လာရေ သံစဉ်တိရာ။

အိပ်ရာက တရေးနိုးတိုင်း မင်းဂီတာသံကို တောင်.တမိရေ။ မလာမှန်းသိကေ.လေ ဒေပိုင်အရူးပေါ်မိရေ။ မင်းဆိုနိန်ကျတေးခြင်းတိကို ငါပြန်ပနာ ဆိုမိရေ။ ဆိုရစွာ အဓိပါယ်မရှိကာ ပိုင်ရှင်မဟုတ်လို.လားမသိ။ ငါ.အိမ်ရှေ.က ခုံတိလဲပိုင်ရှင်မဲ. နိန်ရေကာမင်း။ ငါမျှော်လင်.ခွင်.ရှိသိလား။

ငါလေ လူတိုင်းကိုပြောဖြစ်တေ သိလား။ ဇာအရာကိုပင်ဖြစ်ဖြစ် မမျှော်လင်.ကေ.လို.။

မျှော်လင်.လို. ဖြစ်မလာကေ ကကောင်းခံစားရရေလို.။ ငါ.ကိုငါလေ ယင်းမျှော်လင်.ချက်ထဲက နိန် ရုန်းမထွက်နိုင်သိ။ တစ်နိန်.နိန်. မင်းပြန်လာဖို.လား ဆိုရေစိတ်တစ်ခု ငါ.မသိစိတ်ကို ကြီးစိုးနိန်ရေ။

မွီးရပ်မြီကိုပြန်ချိန်တိုင်းလဲ အရင်ပိုင် ရင်ခုန်မှုတိနဲ. မဟုတ်ကာမင်း။ 

မင်းမရှိရေ ငါ.မွီးရပ်မြေကို ပြန်ရစွာ ပျင်းဖို.ကောင်းနိန်ရေ။ ငါမပြန်စွာ ဇာလောက်ကြာဗျာလ်လေ။ 

ငါလေ ကြောက်နိန်ရေ မင်းမရှိရေ ဒေမြို.မှာ ငါနိန်ဖို. သတ္တိမရှိကာ။

မင်းသိလား ငါလေ ဒေစကားကိုကကောင်းသဘောကျရေ " အချစ်ဆိုစွာ မိန်းမတစ်ယောက်တွက် တစ်ဘ၀လုံးဖြစ်ကေလေ ယောက်ကျားတစ်ယောက်တွက် ဘ၀တစ်ခုလုံးတွက် အစိတ်အပိုင်းချေရာဖြစ်တေလတ်။ "

ငါ.ဒေလောက်အသက်ရွယ်ထိ နိန်ပြီးဗျာလ်။ ဒေတစ်သက် လူတစ်ယောက်ကို စိတ်ဝင်စားဖူးရေ။ တစ်ဘ၀လုံးလွမ်းရလောက်အောင် ငါဇာအမှားတိ လုပ်ခမိလေ။ ငါလေ အရာလူတိနဲ.တန်းတူ အချစ်ကို ပျော်ပျော်ချေ ခံစားဖူးချင်ရေ။ မဖြစ်နိုင်လာ။ ငါထင်ခရေအချစ်နဲ. ငါတွီ.ခရေအချစ်နဲ. သုံးနဲ.လေးပိုင် ပြောင်းပြန်ဖြစ်နိန်ရေကာ။

သတိရရေမင်း။ တစ်ကြိမ်တစ်ခါရာ ချစ်ခဖူးရေ မင်းနဲ.၀ီးကွာလားခရစွာ ငါ.ရို.နှစ်ယောက်ကြားမှာ ဇာသူ.အမှားကြောင်.လဲမင်း။ လက်ခုပ်စွာ နှစ်ဖက်တီးမှမြည်ကေလေ. နာကြင်နိန်ရေ လက်တစ်ဖက်က မတီးချင်ဘဲနဲ. တီးခရစွာကိုတော. လူတိသိကတ်ဖို.မဟုတ်။ ငါ.ရင်ထဲမှာလေ မြည်ဟီးနိန်ရေ မင်းကိုပြောချင်ရေ စကားတိ။ မင်းနဲ.၀ီးစွာ အခုဆိုကေ နိန်.ပေါင်းညပေါင်းများဗျာလ်မင်း။ 

မခံနိုင်လို. တစ်ခါတစ်ခါ ဒေပိုင်ရွီးမိပါရေ။

ငါချစ်တေ မိုးရာသီမှာ ငါအနှစ်သက်ဆုံး ကံ.ကော်ပန်းကို တောင်.တလို.တောင် ရချင်ရနိုင်လားဖို.။ မင်းကို ပြန်လာလတ်ပါ ပြန်လာလတ်ပါ ဆိုပနာ ငါအော်နိန်လို. အပိုရာမင်း။ ဆုံနိုင်ခွင်. တစ်ခါချေလောက်ပီးပါ။ မင်းအကြောင်းတိကို စိတ်ကူးနဲ. ပုံဖော်နိန်မိရေ ဘ၀က လွတ်ချင်ဗျာလ်မင်း။

မရိုးရေ အလွမ်းတိနဲ. မင်းထားပခရေ တစ်နေရာမှာ ဆက်ပြီးစောင်.နိန်ပါရေ။ ငါတစ်ယောက်တည်းမဟုတ်မင်း စိတ်မပူကေ. ငါ.အနားမှာ အထီးကျန်ခြင်းတိပါ အတူတူရှိနိန်ရေ။

ပုလဲမျက်ရည်မဟုတ်တေ ငါ့မျက်ရည်

မျက်ရည်သိမ်းထားဖို.တွက် ဖြစ်လာစွာမဟုတ်။ ကျဖို.တွက်ထည်.ပီးလိုက်စွာ ကြိုက်သလောက်ကျ။ ဖေချာ.ပီးစရာမလို။ အခွန်ဆောင်စရာမလို။ ရင်တိကွဲထွက်ဖို.ပိုင် ခံစားနိန်ရလာ ဖွင်.ချပလိုက်ပါ ခံစားရသမျှကို သွန်ချခွင်.အပြည်.အ၀ ရှိရေ။


မကြာမကြာ စီးကျနိန်ရေ ဒေမျက်ရည်တိ။ ဇာလုပ်သင်.လေ ငါ.မျက်လုံးတိကို ဖောက်ထုပ်ပလိုက်ချင်ရေ။
အားငယ် အားပျော. စိတ်ဓါတ်ကျ ယုံကြည်မှုကင်းမဲ.ဒေစကားလုံးတိကို နင်တစ်ယောက်တည်း အပိုင်သိမ်းထားဖို.ဗျာလ်လာ။

ခလုတ်ကန်သင်း ကိုရာ မြင်နိန်ပြီးကေ ပန်းတိုင်းကို မမြင်စွာ နင်တစ်ယောက်တည်းလား။
ခံနိုင်ဖို.သိလား ဇာရောက်ခလေ အင်းအားတိ ခံနိုင်ရည်တိ။ ဇာနားမှာ ပုန်းနိန်ကတ်လေ။
စီးဆင်းလာရေ ငါ.မျက်ရည်မှာ အပြစ်ရှိစွာလား ငါ.မှာ အပြစ်ရှိစွာလား။

စိတ်ညစ်စရာတိကို ဇာလို. လူတိကိုဖွင်.ပြောဖို.လဲ ကိုယ်တောင် စိတ်ညစ်ပါရေဆိုကေ အရာလူတိကို ဖွင်.ပြောပြီးကေ စိတ်ညစ်ခိုင်းဖို.လား။ ရုန်းရဖို.သိ ကျန်ရှိနိန်ရေ ဘ၀တွက်။

မျှော်လင်.ချက်မျက်ဝန်းတိတွက် ငါ.ရင်ဘတ်ထဲက သံစဉ်တိကို ဥပက္ခာပြုထားလိုက်အုန်းသိ။
ပြီးလားဖို.စွာရာ တနိန်.တာ ဆိုပြီးကေ ဖြေသိမ်.ကောင်းတုန်း။
လာချင်စွာလာဖိ ဒေချင်.ထက် နာကြင်ဖို.သိလားယေ။

မဆန်းကေလေ. မရိုးရေ နိန်ဝင်ချိန်

မေယူတောင်တန်းထဲ ၀င်လားခရေ နီလုံးကို  နီဝင်ချိန်တိုင်းမှာ မြင်ချင်ပါရေ။

        မြို.ကြီးတိပိုင် ဈီးကြီး၊   ဆေးရုံကြီးတိ၊ စာတိုက်ကြီးတိ၊ ကျောင်းတိ ကြီးကြီးမားမား မဟိကေလေ့ ငါ့မြို့ချေစွာ အဓိပ္ပါယ်တိ အများကြီးနဲ့ သာယာလှပနိန်ရေ။ အိနြေ္ဒ ဟိ, ဟိနဲ့  ထီးထီးမားမား ခံခံညားညားနဲ. တည်ဟိနိန်ရေ မေယူတောင်တန်းကြီးအောက်မှာ  စီးဆင်းနိန်ရေ မေယူမြစ်ဘေးနားက ဟိရေ မြို.ချေတစ်မြို.မှာ လူဖြစ်ခွင့်ရရေ ငါ့ဘ၀ကိုငါကျေနပ်တယ်။  

       ညစာဖက် ထမင်းစားပြီးတိုင်း အိမ်ကမလားရရေ ချောင်းဘေးနားက တန်းထားချေကို ခိုးလားပြီးကေ ခြီနှစ်ချောင်းစလုံး တန်းထားအောက်ကို တွဲလောင်းချထားပနာ တိမ်တောက်ချိန်ကို ထိုင်ကြည့်ရစွာ တနိန့်တာပင်ပန်းလာစွာတိ ဇာကိုရောက်လားလေမသိ။ လောင်းချေနဲ. ဈီးရောင်းလို့ပြန်ကတ်တေ မိသားစုတိ ဇာရွာကမှန်းမသိကေလေ့ လှမ်းအော်ပနာ "ပြန်ပါဗျာလ်လား" လို့ နှုတ်ဆက်ခရေ အချိန်တိကို ပြန်ပနာသတိရမိရေ။ ရှားရှားပါးပါးမြင်ရခဲရေ လင်းပိုင်ကောင်တိ တစ်ခါတစ်ခါရီထဲက ပေါ်လိုက်ပျောက်လိုက်နဲ့ ငုပ်နိန်ကတ်စွာတိကို မြင်ရရေ။ ဟိုဘက်ကမ်းမှာ လယ်ထွန်းပြီးကေ ပြန်လာနိန်ကတ်တေ လယ်သမားတိက တစ်နိန့်တာ ကုန်ဆုံးချိန် သင်္ကေတကို ဖော်ကျုးနိန်ရေပိုင်။ သဘောင်္ဆိပ်ကမ်းမှာ ရီကူးနိန်ကတ်တေ အချေတိ၊ လူကြီးတိကို မြင်ရစွာ စိတ်ချမ်းသာဖို့ ကောင်းရေ။ အာကာထက်မှာ တိမ်တိနဲ့ တည်ဆောက်ထားရေ ကျားတိ၊ ဆင်တိ၊ လိပ်တိ၊ ကြောင်ချေတိကို မြင်ရရေ ပန်းချီကားက ဗန်ဂိုဆွဲခရေ ပန်းချီကားထက် အဆတစ်ရာ ပိုလှနိန်ရေ။ လူလုပ်တေ ပန်းချီမဟုတ်ဘဲ သဘာဝအတိုင်းလှနိန်ရေ ပန်းချီကားချေဖြစ်တေ။ ပုဇွန်ဆီရောင် တိမ်တောက်ချိန်မှာ အကျဉ်းတန်းရေ မ,မတောင်လှရေဆိုရေ စကားချေကို အမှန်ရာမလားယေလို့ စိုင်းစားမိခရေ။  

       နိန်ဝင်ချိန်တိုင်း မြင်နိန်ရရေ မရိုးရေမြင်ကွင်းတိ ငါ့တွက် အမြဲတမ်းလှပနိန်ရေ။ ရီအိုးနှစ်လုံး နဲ့ရီခပ်နိန်ကတ်တေ မ,မချေတိဟိရေ။ စွန်တင်နိန်ကတ်တေ ကလိုင်ချေတိဟိရေ။ ဘောလုံးကျောက် ခြင်လုံးခတ်နိန်ကတ်တေ မင်းကျွန်ပျိုတိနဲ့ စည်ကားလှပနိန်ရေ။ ကန်ဘောင်ထက်မှာ ရေဒီယိုနားထောင်ပနာ စကားထိုင်ပြောနိန်ကတ်တေ အဘိုးရှင်ရို့ဟိရေ။ ယင်းဘေးနားချေမှာ အချေတိ ပြီးတမ်း၊လိုက်တမ်း ကစပ်နိန်ကတ်တေ။ အိမ်ရှိ့က မြက်ခင်းမှာ ထိုင်ပနာစကားပြောနိန်ကတ်တေ အဘောင်ရှင်ရို့ ဟိရေ။ ဒေမြင်ကွင်းတိ ငါ့မျက်လုံးထဲမှာ ညစာကပိုင် မြင်ယောင်နိန်သိရေ။ ကြီးကျယ်ခမ်းနားရေ နိုင်ငံတစ်နိုင်ငံမှာ ဇာမှာလေ မုသားမပါရေ နီဝင်ချိန်။ မီးခိုးငွေ့တိနဲ့ စက်ရုံကထွက်တေ အငွေ့အသက်တိနဲ့ ပြည့်နက်နိန်ရေ အာကာမှာ ဖြူစင်ရေ တိမ်တောက်တိကို ရှာလို့တွီ့နိုင်ဖို့လားယေ။

       မြို့ချေတစ်ခုဖြစ်ကေလေ့ စိတ်ထားဖြူရေလူတိဟိရေ။ ကိုယ်မှားကေ အမှန်ကို ထောက်ပြတတ်တေ မိဘ အသိုင်းအ၀ိုင်းဟိရေ။ ဟန်ဆောင်ခြင်းတိမဟိရေ ချစ်ဖို့ကောင်းရေ သူငယ်ချင်းတိဟိရေ။ ထမင်းစားဖို့ မကျန်လိုက်ကေ ရပ်ကွက်ကိုပတ်ပနာ ထမင်းဝင်စားလို့ရရေ။ ညဉ့်ခါတိုင်ကေ လမင်းမသာရေနိန့်တိတောင်မှ ဖယောင်းတိုင်ထွန်းပနာ "ဆီထိုးတမ်း၊ ပုန်းတမ်း၊ ၀ှက်တမ်း၊ အတွဲလိုက်တမ်း၊ ကြိုးခုန်တမ်း၊ ဒူထိုးတမ်း၊ အောင်လံဆီးတမ်း " ကစပ်လို့ရရေ။ အိပ်ဖို့မလာသိလို့ မေမေ တုတ်နဲ့ သတ်ဖို့လိုက်လာမှ ပြီးဝင်ခရေ အချေခါဘ၀။

အော် ငါလဲအသက်အရွယ် ရလာဗျာလ်မနားယေ။ ပြန်ပနာ တောင့်တမိပါရေ ဖြူစင်ရေ နိန်ဝင်ချိန်တိုင်းကို။

အီးမြရေ အမင့်အရိပ်

အပူပင်ကင်းရေ အချိန်တိကို တောင့်တနိန်လို့ အပိုဗျာလ်။ ရူးဖို.ပိုင်တွီ.ရေကာ မယ့်မယ်ကိုသတိရစွာ။ မယ်မယ် နန်းစံမှားလား။ စိတ်ဖိစီးမှုရှိမှ မယ်မယ်ကိုသတိရစွာ။ နိန်မကောင်းမှာ မယ်မယ်ကိုသတိရစွာ။ ဒုက္ခတွီ့မှ မယ်မယ်ကို သတိရစွာ။ ပြသာနာတိကြုံမှ မယ်မယ်ကိုသတိရစွာ။
မယ်မယ်က နန်းစံကို အောက်မိန်.စွာ ရူးဖို့ပိုင်တွီ.ကေ နန်းစံသတိရစွာကို မယ်မယ် ဇာနဲ.နှိင်းဖို.လဲ။ နှိုင်းဖို.စကားရှာလို့ ရဖို.လားမယ်မယ်။ နန်းစံဇာခါရင့်ကျက်ဖို့လဲ မယ်မယ်။

မယ်မယ် 

ဒေစိတ်တိကိုမုန်းရေ မယ်မယ်။ နန်းစံဇာခါ ရင်.ကျက်ဖို.လဲ။ ဒေကုတလော စိတ်ဆင်းရဲရေ မယ်မယ်။ နန်းစံရင်မှာ ဆို.နိန်ရေ။ ဒေဇာမဟုတ်တေ စိတ်ဆင်းရဲမှုချေတိကို နန်းစံ ဆက်ပြီးခံနိုင်ရည်ရှိဖို. မဟုတ်ဗျာလ်ထင်ရေ မယ်မယ်။ မယ်မယ်ကို ကတိပီးခစွာတိ မတည်နိုင်စွာကို တောင်းပန်ရေ။ ပျော်ပျော်နိန်ပါမယ်။ဇာဖြစ်ဖြစ် ဇာပင်လာလာ နန်းစံ ပြုံးပြုံးချေ ရင်ဆိုင်ပါမယ်လို. မယ်မယ်.ရင်ကနိန် ခွဲထွက်လာရေခကပင် ကတိပီးခကေ့လေ မတည်နိုင်ကာ မယ်မယ်။

မယ်မယ်

နန်းစံလေ ကိုယ်.စွာကို ကတိပီးထားစွာရှိရေ။ ဇာပြသာနာပင်ဖြစ်ဖြစ် တစ်လမှာ တစ်ခါရာငိုဖို.လို.။ ဒေကတိကိုလဲ မတည်နိုင်ကာ မယ်မယ်။ နန်းစံစိတ်ကို ဇာလုပ်သင်.လေ။

 စိတ်ပျက်တေ။ အရာလူတိက ဒေပိုင်မဟုတ်ကာ။ နန်းစံတစ်ယောက်တည်းရာ ဒေပိုင်စိတ်ကို ပိုင်ဆိုင်လာ။ စိတ်ဓါတ်မကျအောင် စာအုပ်တိဖတ်ပီးရေ။ ယင်းကြားထဲကနိန် တစ်ခါတစ်ခါ စိတ်လွတ်လားရေ။

ကိုယ်.စွာကို တစ်ခါတစ်ခါ ဆန်းစစ်ကြည်.မိရေ။ နန်းစံစွာ အထွီးဆုံးဖြစ်လို. ဒေပိုင်ဖြစ်နိန်လားလို.။ မဟုတ်မယ်မယ် အရာ သားသမီးတိ အထွီးဆုံးဖြစ်လို. တစ်ယောက်တည်း တစ်ဦးတည်းသောသားသမီး ဖြစ်လို.ဆိုပြီးကေ စိတ်ဓါတ်ကျစွာတိ ကိုယ်.စွာကိုယုံကြည်မှုမရှိစွာတိ နန်းစံပိုင်မရှိကတ်ကာ။

မယ်မယ်

နန်းစံ ဘ၀ကိုရှေ.ဆက်လျှောက်ဖို. အင်အားမရှိရေပိုင် ခံစားနိန်ရရေ။ မယ်မယ်.သမီးမဟုတ်ရေအတိုင်းကာ မယ်မယ်။ မယ်မယ်ခွင်.လွှတ်ဖိ။ ဒေနိန်.တစ်ရက် နန်းစံပြောချင်စွာတိကို ပြောချင်ရေ။ နန်းစံမျိုသိပ်လာစွာကြာဗျာလ်။ ဒေမျက်ရည်စွာ ဒေစာဆုံးစွာနဲ. တိတ်ပါလီဖိ။ 

ဒေကုတလော ပင်ပန်းရေမယ်မယ်။ လူပင်ပန်းစွာထက် စိတ်ပင်ပန်းစွာကို နန်းစံမခံနိုင်။ 

 နန်းစံကို အချေလဲမဟုတ်ဘဲနဲ. ငိုနိန်ရေလတ်။ မယ်မယ် အချေရာ ငိုတတ်စွာမဟုတ်။ အကြီးတိလဲငိုရေနန်းရာ။ အချေခါ ကျရေ မျက်ရည်က ကောင်းသိရေ ပူဆွေးမှုတိမပါ။ 

ဒေကုကျရေ မျက်ရည်က လုံးဝမခံနိုင်လို့ ကျစွာမျက်ရည်။ 

ဟုတ်တေ ဇာဖြစ်ဖြစ် အငိုနဲ. အဆုံးသတ်တေ လူဆိုစွာ လူညံတိ အလုပ်ဆိုစွာကို။ 

ယကလေ့ ငိုပလိုက်မှ ရင်ထဲက ခံစားချက်တိ သက်သာလားရေ မယ်မယ်။ 

ဟန်ဆောင်ပြီးကေ ပြုံးပြနိန်ရစွာကိုလဲ မုန်းပါလတ်ဗျာလ်။ ဒေခံစားမှုထဲက ထွက်ပြီးချင်ရေ မယ်မယ်။

 မယ်မယ်

နန်းစံလေ အလုပ်ချင်ဆုံးတစ်ခုရှိရေ။ တစ်လလောက် မနှိုးဘဲနဲ. အိပ်ချင်ရေ။ 

ဒေခံစားမှုရှိရေ ဘ၀က လတ်တလော ရှောင်ခွါချင်ရေ မယ်မယ်။ 

မယ်မယ် ရင်ဆိုင်ခစွာနဲ.နှိုင်းလိုက်ကေ ဒေကုနန်းစံခံစားနိန်ရစွာက တောင်နဲ. သဲမှုန်.ချေပိုင်ရာ။ 

မယ်မယ်က ငါ.မှာသမီးနှစ်ယောက်ရှိရေ ဆိုရေ စိတ်ဓါတ်နဲ.အရာရာကိုရင်ဆိုင်ခကေလေ. နန်းစံက မယ်.မယ်အတွက်ဆိုပြီးကေ ရင်ဆိုင်ရဖို.ဆိုရေ အသိစိတ်နဲ. ရင်ဆိုင်ဖို့ ဇာလို့ အင်အားတိ ဆုတ်ယုတ်နိန်ရလေ။

မယ်မယ်

တခါတလီလေ နန်းစံ ဒေအောင်မြင်မှု ပန်းတိုင်းတိကို စွန်.ပလိုက်ချင်ရေ။ အသက်ရှင်သန်ရစွာကိုလဲ ငြီးငြွေ.ပါလတ်ဗျာလ်။ မယ်မယ် သိဖို.မဟုတ် နန်းစံမှာ ဒေပိုင်စိတ်ဓါတ်ရှိစွာကို။ ကိုယ်.စွာကိုလဲ ကြောက်ပါလတ်တေ။ ဇာလို. နန်းစံစွာ အသက်ရှင်သန်ရစွာကို တန်ဖိုးမထားရစွာလေ။ 

ဇာလို.မုန်းနိန်ရလေ ဒေလူ.ဘ၀ တစ်ချက်ချေကို ပျော်ပျော်နိန်သင့်ရေ။ ဇာနိန်.ဇာရက်မှာမှပြီးဆုံးလားဖို.လဲ။ 

ဒေပိုင်ဗျာလ် ဘ၀တိက ဇာနှစ်ခါ အီးအီးဆီးဆီး နိန်ရလို့ရှိလေ တစ်ခုမဟုတ် တစ်ခုပူနိန်ရစွာမလား။

မယ်မယ်

နန်းစံသူများနိုင်ငံမှာနိန်ရစွာ တစ်ယောက်အမှားလဲမပါ။ သမီးကို နိုင်ငံခြားလွတ်ရလို့  ရင်နင့်နိန်ရေ အမိ့တစ်ယောက်ခံစားချက်ကို နားလည်ယင့်အမင်။ နန်းစံ ကိုယ့်ဘ၀ကိုယ် စိုင်းစားလိုက်ကေ တစ်ခါတစ်လီ ရင်ထဲမကောင်း။ မယ်မယ်ကိုလဲ ကကောင်းသနားရေ။ မယ်မယ် နန်းစံရို.ရှိရဲ့သားနဲ့ ဒုခရောက်ရရေ စိတ်ဖိစီးမှု ခံစားရတုန်းသိ ဒေကုထက်ထိ။ နန်းစံရောက်ချင်ရေ တစ်နိန်.ကိုရောက်ဖို့ အ၀ီးကြီးလိုသိရေကာမယ်မယ်။ တနားချေလောက် စောင့်ပီးမယ်မယ်။
နီဝင် မိုးလင်းနဲ့ ဒေပိုင်အချိန်တိကုန်လားကေ နန်းစံရောက်ချင်ရေနိန့်ကို ရောက်ဖို့ဗျာလ်ဖြစ်လို့ နီဝင်ချိန်တိုင်းကို စောင့်မျှော်နိန်တတ်ပါလာဗျာလ် အမင်။

မယ်မယ် 

နိန်ကောင်းရေမနား။ နိန်ကောင်းပါစီ မယ်မယ်။ မယ်မယ် လှဲလို့မရသိ။ တောင့်ခံထားနန်း။ 

အမင် ခါးမသန်ဗျာလ် ဆိုစွာကိုသိခကေ့လေ့ နန်းစံရို. တစ်ခုလဲ မကူနိုင်ခ။ အားတင်းထားအုန်းမယ်မယ်။ မယ်မယ်ပါးကို နိန်တိုင်းဖုန်းဆက်ချင်ပါရေ။ ရန်ကုန်မှာ နိန်လို့ ဖုန်းဆက်ကေတောင် သတိရလို့ ဆိုပြီးကေ မယ်မယ်ငိုရေ။  မယ်မယ်တော့ ဒေကုထက်ထိ ထင်နိန်တုန်းမလား။ 

နန်းစံစွာ မယ်မယ်သတိရစွာလောက် သတိမရဆိုပြီးကေ။ မယ်မယ်မသိ ရန်ကုန်ရုံးခန်းက မမတိသိရေ မယ်မယ်နဲ.ဖုန်းပြောပြီးတိုင်း ရေချိုးခန်းဝင်ပြီးကေ ငိုစွာတိကို။ မယ်မယ်ကိုသတိရရေ ယကေ့လေ နန်းစံတစ်လမှာ နှစ်ခါလောက်ရာဆက်ဖို့လို့ဆုံးဖြတ်ထားရေ။ မလွမ်းချင်မယ်မယ်။

မယ်မယ်

ထမင်းစားရေ အချိန်တိုင်း အိမ်ကထမင်းဝိုင်းကိုလွမ်းရေ မယ်မယ်။ နန်းစံလေ ရုံးပြန်လာရေ အချိန်တိုင်း ထမင်းစားဖို့စွာကို ကြောက်တေမယ်မယ်။ ကိုယ်ချက်ထားရေ အချိုမုန့် ငပိမပါရေ အသားကြော်နဲ့ နန်းစံ ထမင်းဝိုင်းမှာ ထိုင်ပနာ အီးစက်နိန်ရေထမင်းကို စားရဖို့စွာကို ကြောက်စွာထက် ငေါင်ငေါင်ကြီးကိုယ့်အနားမှာ တစ်ယောက်လဲမရှိဘဲနဲ့ ဒေပိုင် အထီးကျန်ရေ ထမင်းဝိုင်းကို မုန်းရေ မယ်မယ်။ အချေခါပိုင် တစ်ယောက်ဇာလောက်စားရဖို.ဆိုပြီးကေ အ၀ီကျစားရရေ ထမင်းဝိုင်းကို ကကောင်းအောက်မိန်.ရေမယ်မယ်။ ထမင်းစားဖို.စွာတောင် နန်းစံကြောက်တေ။ စားချင်စိတ်လဲမရှိ။

မယ်မယ်

အိမ်ဆိုစွာ ဇာကိုခေါ်လေ မယ်မယ်။ နန်းစံအိမ်ပြန်လာရေ အချိန်တိုင်း ကိုယ့်သော့နဲ့ တံခါးကိုဖွင့်ပနာ ၀င်ပြီးနာ ပြုံးပြီးကေ နွီးနွီးထွီးထွီးကြိုဆိုဖို.လူမရှိရေအိမ်ကို အိမ်လို.ခေါ်လား။ တွီ.ကေတောင် ဟန်ဆောင်ပနာ အာလာပသလာပ မမိန်းရေ နေရာစွာ နန်းစံအိမ်လား မယ်မယ်။ 

ဇာစားချင်လေလို့ မိန်းဖို့လူတစ်ယောက်လဲမရှိ။ အရင်ခါပိုင်အစား ဂျီကျလို့မရလို့ မစားဘဲနဲ့ ရာနိန်ဖြစ်တေ။ ထမင်းလုံးဝမချက်တေ မယ်မယ် ဒေသမီးပူဆာမှ ထမင်းချက်ပီးရေ မယ်မယ်။ 

မယ်မယ့်ထမင်းကို တစ်ရက်လောက်စားချင်ရေမယ်မယ်။ မစားရစွာ ဇာလောက်ကြာဗျာလ်လေ။

မယ်မယ်

ထိမ်းထားစွာကြာဗျာလ် မယ်မယ်။ ဒေနိန့် နန်းစံ ရင်ဖွင်.မိရေ။

နန်းစံလေ တစ်ခါတစ်လေ လမ်းလျှောက်ဖြစ်တေ ရည်ရွယ်ချက်မရှိဘဲ။ ပျင်းရေမယ်မယ်။ အရူးတစ်ယောက်ပိုင်ရာ အသိစိတ်ကင်းမဲ.ပလိုက်ချင်ရေ။ ရူးဖို.ဗျာလ်ထင်ရေ။ နန်းစံရင်ထဲမှာ အပူပင်တိကကောင်းများနိန်ရေဂါ။ မယ်မယ် ဒေအချိန်ဆိုကေ အိပ်နိန်ဗျာလ်လား။ ပင်ပန်းလို.ရှိဖို.။ 

မယ်မယ် အလိုမလိုက်ခသင်. နန်းစံကို။ ဒေကု နန်းစံကို အလိုလိုက်ဖို.လူ တစ်ယောက်လဲမရှိ။ 

ငိုချင်ရေ မယ်မယ်။ မယ်မယ်ရို. မကျီးရို. မထွီးမတိပါးကို ဆိုးခသမျှ ဒေကု ဆိုးလို့မရဗျာလ်မယ်မယ်။

မယ်မယ်

နန်းစံလေ ဒေကုဖျားကေ အရင်ပိုင်မလုပ်ဗျာလ်။ လိမ္မာလာဗျာလ်။

အဘောင်ရှင်အသက်ရှင်နိန်ခရေ အချိန်တိကို ကကောင်းသတိရရေ မယ်မယ်။

နိန်မကောင်းလို. ဆေးခန်းပြဖို.လားကေ ဆရာဝန်က အဖျားကြီးလို. ဆေးထိုးဖို.ဆိုကေ အဘောင်ရှင်က သူ.မြီးချေ ဆေးထို.ဖို.စွာ ကြောက်စွာသိလို. သောက်ဆီးပီးခိုင်းရေ။ အိမ်ကိုရောက်လို. ဆေးသောက်ဖို. ခိုင်းကေ အဘောင်ရှင်မမြင်ခင် ဆေးတိကို အားလုံးဝဲပလိုက်တေ။ ပြီးကေ ကိုယ်စားချင်ရေ အချဉ်စားပလိုက်မှ ရောဂါကောင်းလားရေ။ ဆေးကိုဝဲပလိုက်စွာကို အဘိုးရှင် သိလခလို. ယင်းခါကပင် ဆေးသောက်ခိုင်းတိုင်း လူသုံးယောက်လောက်နဲ. အားဓမ ကိုယ်ကိုကိုင်ပနာ သောက်ခရစွာတိကို ပြန်ပနာမြင်ယောင်သိရေမယ်မယ်။

မယ်မယ်

အမိလဲ ဒေမယ်မယ် အဖလဲ ဒေမယ်မယ် အနှိုင်းမဲ. ငါရို.မယ်မယ်။ မယ်မယ်တောင် မိဖတာဝန်ကို တစ်ယောက်တည်းယူခရေ။ ဒေလောကတစ်ခုလုံးကို သမီးနှစ်ယောက်ပါးပုံအပ်ခရေ။ 

ဇာပင်လာလာ သမီးနှစ်ယောက်ကို နောက်မှာထားပနာ တစ်ယောက်တည်းရင်ဆိုင်ခရေမယ်မယ်။ သိရေမယ်မယ်။အိပ်ရာဝင်းတိုင်း မယ်မယ် သက်ပြင်းချရေ အသံကို နန်းစံမကြားဘဲနဲ. နိန်ဖို.လားယေ။ မယ်မယ် အနာဂါတွက် ရင်မောနိန်စွာတိကို နားလည်ရေမယ်မယ်။ 

နန်းစံကူနိုင်ဖို့တွက် ကြီုးစားနိန်ရေမယ်မယ်။

မယ်မယ်

ဖြစ်နိုင်ကေ မယ်မယ်နဲ. အရင်ပိုင်တူတူ အိပ်ချင်သိရေ။ သူငယ်ချင်းတိကလေ ပြောကတ်တေမယ်မယ်။ နင်လေ အသက်နှစ်ဆယ်.ရောက်ဗျာလ် အမိနဲ.အိပ်တုန်းဆိုဝေါ။ ဇာဖြစ်လေ အမိနဲ.အိပ်စွာမှာ အသက်ကန်.သန်.ထားလာ။နန်းစံ အသက်တစ်ရာပင်ဖြစ်လီပတ်စီ။ နန်းစံစွာ မယ်မယ်.အတွက် အမြဲတမ်းအချေရာ။

မယ်မယ်

နန်းစံ ဇာခါရင်.ကျက်ဖို.လဲ။ အသက်အရွယ်နဲ. အတွီ.အကြုံလဲ ရသင်.သလောက်ရပြီးဗျာလ်မနားယေ။ ဇာအချိန်ကျမှ ဘ၀ အနည်ထိုင်ဖို.လဲ မယ်မယ်။ ဒေစိတ်တိကို ဖြစ်နိုင်ကေ နန်းစံ ၀ဲပလိုက်ချင်ရေမယ်မယ်။ မယ်မယ်.အရိပ်အောက်မှာ ပြန်ပနာခိုလုံချင်ရေ မယ်မယ်။ အီးမြရေအရိပ် အီးချမ်းရေအရိပ် လုံခြုံမှုရှိရေအရိပ် နွီးထွီးမှုရှိရေအရိပ်စွာ အမင့်အရိပ်ကလွဲလို့တစ်ခြားဇာအရိပ်ရှိသိလေမယ်မယ်။

မယ်မယ်

တစ်နိန်.နိန်. မယ်မယ်.အနားကို နန်းစံအရောက်ပြန်လာလတ်မေ မယ်မယ်။ တနားချေ သည်းခံနန်းမယ်မယ်။

ငါ.စာအုပ်အဟောင်းထဲက မှတ်စုချေတိ (၁)

ကိုယ်.စိတ်ကို ခွန်းအားဖြစ်စီဖို.တွက် ရောက်တေနေရာမှာ မြင်သမျှ ကြားသမျှကို ဒေပိုင်မှတ်ထားပြီးကေ စိတ်ဓါတ်ကျရေ အချိန်တိုင်းပြန်ဖတ်မိရေ မှတ်စုချေတိ 


၁။ တစ်ဦးက အောင်မြင်မှုကို ရည်ရွယ်ကြိုးပမ်းနိန်ရအချိန်မှာ အခြားတစ်ဦးက စိတ်ချမ်းသာ ပျော်ရွင်ရေးကို  ဦးတည်ကြီုးစားနိန်ရေ။

၂။ လူအချို.ရေ အချိန်ကို ဖြုန်းပစ်နိန်ကတ်တေ။ အချိန်ကုန်မှ တသသ ပြန်လည်တမ်းတကတ်တေ။

၃။ ငါ.၇ို.တိစွာ ငါရို.ထက် နိမ်.ပါးရေလူတိကို မျှဝေပီးကမ်းခြင်းနဲ.. ပျော်ရွင်မှုကို ရယူခံစားနိုင်ကတ်တေ။

၎။ အတွေ.အကြုံနည်းစွာရေ သည်းမခံနိုင်မှုကို ဖြစ်ပေါစီရေ။
 သည်းခံနိုင်ခြင်း ဆိုစွာမှာ နားလည်မှု ရှိမှ ဖြစ်ပေါ်လာပြီကေ အတွေ.အကြုံ မရှိကေ.လဲ နားလည်မှု     မဖြစ်လာနိုင်။ ယင်းနဲ.လို.. ဘ၀ထောင်.စုံမှ ရနိုင်သမျှ အတွေ.ကြုံ များများ ကျယ်ကျယ်ပြန်.ပြန်. ရအောင်လုပ်နိုင်လီ ကောင်းလီဗျာလ်။ အထူးသဖြင်. ခရီးအများကြီးလားဖို.လိုအပ်တေ။
( ကေ သီရိ ဓမ္မနန္ဒ )

၅။ လူတစ်ယောက် ဇာလောက်စိတ်ရှည်တတ်လေ စိတ်ထားဇာပိုင်လဲ သိချင်ကေ ခရီးတူတူ လားခြင်းနဲ.သိနိုင်ရေ။

၆။ လူတစ်ဖတ်သားကို ကကောင်းလိုအပ်နိန်ရေ အချိန်မှသာ အကူအညီတောင်းပါ။ ကိုယ်တစ်ယောက်တည်း လုပ်ဆောင်နိုင်ရဲ.သားနဲ. အကူအညီတောင်းမိကေ အကျင်.ပါလားနိုင်ရေ။

ရ။ လုပ်ချင်ကိုင်ချင်စိတ် ( Will ) ထက်သန်ရဖို.။ ( ဆန္ဒဓိပတိ )
လုပ်တတ်ကိုင်တတ် ကျွမ်းကျင်နိုင်နင်းမှု ( Skill ) ရှိအောင် သင်ယူလေ.ကျင်.ကတ်ရဖို. ( ပညာဓိပတိ )
( ချစ်နိုင် - စိတ်ပညာ )

အေနိန်.က ငါရို..အတွက်အရေးကြီးဆုံး

ကိုယ်တိုင်က မိမိကိုယ်ကို အထင်မကြီးကေ ဇာသူကလာအထင်ကြီးဖို.လဲ။
အထင်ကြီးနိုင်အောင် ကိုယ်.အပြုအမှု စိတ်ဓါတ်ကိုလဲ ပြုပြင်နိုင်ရဖို.။ မဟုတ်ကေ အလကားဗျာလ်။
ထမင်းစားနိန်ပြီးကေ သီရာလားလိမ်.မယ်။ လူဖြစ်ရကျိုးနပ်ဖို.မဟုတ်။


လူတိုင်း အချိန်ကိုဖြုးတီးနိန်ကတ်တေ။ ငါအပါအ၀င်။
လူတစ်ယောက်အကျင်.ကိုသိချင်ကေ သူ.အားလပ်ချိန်မှာ ယင်းသဇာတိလုပ်နိန်လဲ ဆိုစွာကို ကြည်.လိုက်ကေရရေ။ ယင်းအားလပ်ချိန်က ယင်းလူရဲ. သမိုင်းကိုပြလားစွာ။ ကောင်းရေ သမိုင်းကိုရွီးဖို.လား။ မကောင်းရေ သမိုင်းကိုရွီးကတ်ဖို.လား။  ဒေလောကမှာ လူတိုင်းကအတူတူမှာ။ တစ်ယောက်လဲ ရွှေထမင်း ငွေထမင်းမစား။


ကြည်.လိုက်ပါ ကမ္ဘာကျော်တဲ.သူထဲမှာ ဆင်း၇ဲရေ သူတိက ပိုများနိန်ရေ။
အဓိကတော. သူရို.တိ ဘ၀နာပြီး သီမတတ် ကြီုးစားခဲ.ကတ်လို.။
စိတ်ဓါတ်ခံယူပုံချင်းရာ ကွဲလားစွာ အောင်မြင်ရေလူ ရှုံနိမ်.ရေလူ ဆိုပြီးကွဲလားစွာ။
တစ်ခုလိုချင်ကေ တစ်ခုကိုစွန်.လွတ်ရကျိုး ထုံးစံကို လူတိုင်းသိရေအတိုင်း ကိုယ်ဖြစ်ချင်စွာကို ဖြစ်ဖို. အပျင်းဓါတ်ခံကို တွဲခေါ်လားလို.မရပါ။


လူတစ်ယောက်စွာ ကိုယ်လျှောက်ခရေ တံတားကိုကိုယ်ပြန်လျှောက်လို.ရအောင် မချိုးပခသင်.။
ယပိုင်ဆိုကေ ဇာပိုင်ပြန်လျှောက်ကတ်ဖို.လဲ။ လူတိုင်းကို ကိုယ်ချင်းစာတရားနဲ. ဆက်ဆံပါ ယပိုင်ဆိုကေ ကမ္ဘာလောကကြီးက နိန်ပျော်ပါေ၇။ သူ.နေရာမှာ ငါဆိုကေ ဆိုေ၇ စိတ်ချေသာထည်.ပီးလိုက်ပါ အားလုံးအဆင်ပြေလားလိမ်.မယ်။ ဇာလုပ်လုပ် ပြီးစလွယ်မလုပ်ကတ်ပါကေ.။

အလုပ်လုပ်ကေ.လဲ ယင်းအတိုင်းရာ။ သူများလက်အောက်မှာနိန်၇ရေ။ ဒေချင်.ငါ.အလုပ်မဟုတ် ဆိုပြီးကေ မလုပ်ကတ်ပါကေ.။ ငါရာ သူဌေးဆိုကေ စိတ်ကိုထားပါ ယပိုင်ဆိုကေ လူတိုင်း အကောင်းဆုံး လုပ်ကတ်ဖို.စွာရာမနား။

ဇာသူက ဇာဖြစ်ဖို.ဆိုပြီး ဟိုဘ၀ကပင် ပါလာစွာမဟုတ်။ အေနိန်. အပေါမှာမှုတည်နိန်ေ၇။
ယင်းသူအေနိန်. ဇာလုပ်နိန်လေ အချိန်ကိုဖြုန်းနိန်လား။ တန်ဖိုးရှိရှိ အသုံးချနိန်လား ယင်းချင်.ပြောလားစွာရာ ယင်းသူ.ဘ၀ကို။

လူတိက တစ်ခါတစ်ခါ အေနိန်. ဆိုစွာကိုမိန်.ထားကတ်တယ်။ ငါကိုယ်တိုင်ကလဲ ဒေချင်.ထဲပါနေစွာကို။
ငါဆုံးဖြတ်ချက်ချလိုကဗျာလ် ဇာနိန်.ကပင်စပြီး စလုပ်ဖို.ဗျာလ် ငါ.ရည်မှန်းထားရေ ခရီးကိုရောက်ဖို. ဆိုပြီးကေ။ ဒေနိန်.ကပင်စလုပ်ကေ ခြေလှမ်းတလှမ်း ပိုမြန်ေ၇ပိုင် ပိုပြီးကေ နီးကတ်လာပါရေ ပန်းတိုင်းနားကိုေ၇ာက်ဖို.။

ယပိုင်ဆိုကေ အေနိန်. အေနိန်.ကို တစ်ခေါက်ချေ မမိန်.ကတ်ပါကေ.။



အေနိန်.အေအချိန်ဆိုစွာက ငါရို.တိအတွက် တပျင်းအရေးကြီးပါရေ။