အိမ်လွမ်းရေလတ်

တစ်ချက်ချေစိုင်းစားကြည့်မိရေ
ငါရို့တိ ကိုယ်ကျိုးတွက်
အိမ်ကိုအောက်မိန့်နိန်ကတ်စွာ
-ထမင်းစားလို့မကောင်းလို့
(မေမေချက်စွာစားချင်ရေထော)
နိန်မကောင်းလို့
(ငါ့မိသားစုရာ အနားမှာရှိကေ နဖူးချေကိုလာစမ်းဖို့ထော)
အလုပ်မှာ အဆင်မပြေလို့
(အိမ်မှာဆို လက်ဝါးဖြန့်ကေဖေ့ချာရရေ)
နွီးထွီးမှုပီးရေလူမရှိလို့

အိမ်ကိုလုပ်ပီးချင်ရေစိတ်
အမိစိတ်ချမ်းသာအောင် လုပ်ပီးဖို့ဆိုရေ
စိတ်ဓါတ် တစ်စိချေတောင်မရှိဘဲ
အိမ်ကိုလွမ်းနိန်ကတ်တေ
ကိုယ့်စိတ်ကို ကိုယ်မသိခွန်ဆောင်
လောကမှာ သနားစရာအကောင်းဆုံး
လူသားက ငါရာမနားဆိုပြီးကေ ၀မ်းနည်း
ကိုယ့်လောဘကို
ရှီတန်းတင်ထားကတ်စွာ...

ကိုယ့်ကိုလုပ်ပီးခံချင်ရေ
ရင်ထဲကဆန္ဒ တပုံတခေါင်းသိုဝှက်
ညောင်နာနာအသံနဲ့
အိမ်ကိုအောက်မိန့်ရေလတ်
ဇာချင့်တွက်အိမ်ကိုလွမ်းစွာလေ
မင်းသားခေါင်းစွပ်ထားရေ ဘီလူးပိုင်
အိမ်ကိုလွမ်းရေ ဆိုရေခေါင်းစိုင်းကို
သုံးနိန်ကတ်စွာမနား...

လူကြားကောင်းအောင်
အိမ်ကိုလွမ်းရေလတ်
အမှန်မှာတော့
ကိုယ့် အတ္တတွက် လွမ်းနိန်ကတ်စွာ...

အကျွန့်တွက် .....

အရိပ်

 မင်းပီးခရေ ရင်ငွေ့ နွီးထွီးတုန်းပါရာ..... အနားမှာ မရှိကေလေ့ မင်းအရိပ်က ငါ့အနားမှာရာ.....

အနားမှာ၇ှိယင့်သားနဲ့
တန်ဖိုးထားရကောင်းမှန်းမသိခ
ပြန်မရရေအတိတ်ကို
ဒေပိုင်နိန့်တိမှာ ပိုပနာသတိရမိရေ
ငြိမ်းချမ်းရေတနိန်ရာမှာ ရှိနိန်လီဖို့လား
ပျင်းရိဖို့ကောင်ရေ ဒေပိုင်ညဉ့်မျိုး
နောက်ထပ်တစ်ည ကြုံရပြန်ဗျာလ်
ဒေတစ်သက်မရနိုင်ရေ ပြန်ဆုံဖို့အခွင့်အရေး
အထီးကျန်ရေ အမှောင်ညတိမှာ
ရီငတ်တေပိုင် ဆာလောင်မှုတိ
ပြင်းထန်လာရေ

မီးမရှိရေအခန်း
မင်းတီးပြခရေ တေးခြင်းတိကို
မရည်ရွယ်ဘဲ တတိုးချေလိုက်ဆိုမိရေ
သီခြင်းတရားက
လူမျိုး ဘာသာ ကျားမ
မရွီးဆိုစွာကို မင်းကဥပမာပီးခယင့်
ဆောက်တည်ရာမရ ခံစားခရရေ
ဝေဒနာတိကို အိနြေ္ဒဆည်လာနိုင်အောင်
အချိန်တိက ငါ့ကိုကုစားပီးခရေ

သေသေချာချာ လွမ်းတတ်ပါလတ်ဗျာလ်
အလင်းမရှိရေနိန်ရာမှာလဲ ငါနိန်တတ်လာဗျာလ်
အမှန်တော့ အချစ်ကိုနားမလည်ဘဲနဲ့
ရယူခြင်း အတ္တတိထဲမှာနစ်မွန်းနိန်ခရေ
ရနံမရှိရေပန်း မတင့်တယ်လတ်
ဟုတ်လား ငါမထင်ကာ
အီးမြရေ မင်းမေတ္တာတိက
ငါ့ကို လုံခြုံမှုတိပီးတုန်း
ငါ့ကို လှပတုန်းပါရာ.

စာရွီးခြင်း

ဇာအတွက်စာရွီးလေ ဇာပိုင်စာရွီးလဲဆိုကေ

ဇာတွက်ရွီးလေ

ပြောချင်စွာတိကို ပြောချင်ရေခါ ရွီးရေ
ခံစားနိန်ရရေအတိုင်း တစ်ယောက်ပါးကလဲ
ခွင့်ပြုချက်တောင်းစရာမလိုဘဲနဲ့လဲ ရွီးနိုင်ရေ
တစ်ခြားလူကို လိမ်ချင်ရေခါလဲစာရွီးရေ
အဖြစ်မှန်ကို မပြောဝံ့ရေခါလဲရွီးရေ
နိန်မကောင်းဖြစ်ကေလေ့ရွီးရေ
အိမ်ကိုအောက်မိန့်ကေလေ့ ရွီးရေ
အသည်းကွဲနိန်ရေ အချိန်တိခါလဲ၇ွီးရေ
နားလည်ဖို့မကြိုးစားဘဲနဲ့ ပက်ပက်စက်စက် အပြောခံရရေခါလဲရွီးရေ
 ထမင်းစားလို့မကောင်းကေလေ့ရွီးရေ
အလုပ်မှာ အဆင်မပြေကေလေ့ရွီးရေ
ဖေချာ့မရှိရေအချိန်ဆိုလဲ လောကကြီးက
ကိုယ့်တွက်မျက်နှာသာမပီးဆိုပနာ ရွီးမိရေ
တစ်စုံတစ်ယောက် ကိုယ့်နားကထွက်လားရေခါလဲရွီးရေ
ကဗျာဆန်ချင်ရေခါလဲ ကဗျာမဆန်ရေစာတိကို ဖွဲ့မိသိယင့်....

ဇာပိုင်ရွီးလေ

မျက်ရည်တိနဲ့ရွီင်္းရေ ပျော်ရွင်မှုတိနဲ့ရွီးရေ
သူများရင်ဘတ်ကို အငှားခံစားပနာရွီးရေ
တစ်ခါတစ်လေ ၀မ်းနည်းမှုတိနဲ့ရွီးရေ
တခါတလေ နှလုံးခုန်နှုန်းရပ်လားမတတ်
နာကြင်မှုတိနဲ့ရွီးရေ
အတိတ်ကို ပြန်ပနာ သတိတရနဲ့ရွီးရေ
နောင်တတိနဲ့လဲ ရွီးမိသိရေ
ဒေါသတိကို မျိုမသိပ်နိုင်ရေအချိန်မှာလဲ
ဒေစာမျက်နှာထက်မှာ ဖွင့်ချမိရေ....

ဇာလောက်ပင် ဇာပိုင်ပုံစံနဲ့ပင်ရွီးရွီး အချေတစ်ယောက်ရွီးရေပိုင် တိုးတတ်မှုမရှိရေ စာရွီးခြင်းတိကို အကျွန်ပိုင်ဆိုင်ထားသိယင့်။ တစ်ချို့တိက ပြောကတ်တေ အချိန်လိုရေလတ်။ ဇာအတွက်လဲမိန်းလိုက်တေ တစ်ယောက်ကဖြေရေ အောင်မြင်ဖို့လတ်။ တစ်ယောက်ကဖြေရေ စာအရွီးအသားကောင်းဖို့လတ်။ နောက်တစ်ယောက်ကပြောသိရေ ခံစားချက်အတိုင်း စာရွီးလို့မရလတ်။ အကျွန်ကတော့ ခံစားချက်မပါကေ စာရွီးဖို့ထားအုန်းသိ ဖောင်တိန်တောင်မကိုင်ချင်။ အောင်မြင်ဖို့တွက် စာရွီးစွာဆိုကေ ယင်းလူကို အထင်ကြီးမိဖို့မဟုတ်။ စာအရွီးအသားကောင်းဖို့တွက် အချိန်အတိုင်းအတာ လိုရေပိုင် စာဖတ်ခြင်းကလဲ မရှိမဖြစ်အရာတစ်ခု။ အကျွန့်၏ စိတ်နှလုံးထွက်ပေါက်စွာ စာရွီးခြင်းဖြစ်တေပိုင် သေချာစွာတစ်ခုက ရွီးချင်လို့ရွီင်္းရေ........ :)

နောက်ဆုံးထွက်သက်

နောက်ဆုံးထွက်သက်ကို အကောင်းဆုံးရူထုတ်နိုင်ဖို့ ငါခံနိုင်ရည်ရှိသိ့လာ။ နောက်ဆုံးထွက်သက်က အရေးကြီးဆုံးလို့ တရားတိမှာ ငါနာဖူးရေ။ ဒေနာကြင်မှုတိက ငါ့စိတ်ကိုငါ ထိမ်းနိုင်ဖို့ နောက်ဘ၀ကူးကောင်းဖို့ ခံနိုင်ရည်ရှိဖို့သိလား။


မြို့နယ်ဆရာဝန်က မကျန်းမာရေ ငါ့ကို စစ်တွေဆေးရုံကြီးမှာ ပြခိုင်းလို့ ဒေကုတလော အိမ်ကလူတိ လှုပ်လှုပ်ရှားရှားဖြစ်နိန်ကတ်တေ။ တစ်ရက်နှစ်ရက်ကေ ပျောက်လားဖို့ဆိုလို့လဲမရ ဒေ၀မ်းစကေ့ချေအောင့်စွာ တစ်ခုလဲမဖြစ်ဆိုလို့မရ စစ်တွေကိုလားဖို့ဂျေယာ တိုက်တွန်းနိန်ကတ်တေ။ မအားရေ သူရို့တိကိုလဲ ဒုက္ခမပီးချင်။ သမီးချေက ကျောင်းကခွင့်ယူပနာ နက်ဖြန်ခါလားရဖို့ဖြစ်လို့ ပစ္စည်းတိကို အသေအချာထည့်ပီးနိန်ရေ။ သူပါလိုက်ချင်နိန်ေ၇ အဖသည်ကို ဆီးခန်းပြပြီးပြန်လာဖို့စွာဖြစ်လို့ မလိုက်ကေ့လို့ပြောပနာ အိမ်မှာလူကြီးမရှိလို့ နိန်ခိုင်းခရေ။ မြီးအကြီးနဲ့ဆိုင်ရောင်းနိန်ရေ သမီးအလတ်ကလဲ အိမ်မှာလူမရှိလို့ မလိုက်နိုင်။ စစ်တွေမှာ Day တတ်နိန်ရေသူ့သမီးချေပါးကို ဖုန်းဆက်ပနာ အဘောင်ရှင်နားမှာနိန်လီလို့ ဖုန်းဆက်နိန်ရေ အသံကိုလဲကြားလိုက်တေ။

စစ်တွေမှာ ဆီးခန်းပြပြီးစွာနဲ့ ဆေးရုံတတ်ခိုင်းလို့ ဆေးရုံတတ်ရရေ။ စစ်တွေမှာရှိနိန်ရေ သမီးကတော့နိန့်တိုင်းထမင်းလာပို့ရေ။ ရွာမှာရှိနိန်ရေ သမီးအကြီးဆုံးကလဲ လာပနာအမိပါးမှာ ပြုစုနိန်ရေ။ သမီးတိဂျေးယာ မွီးထားမိရေငါ အရေးအကြောင်းကျကေ အနားကိုရောက်ပါလတ်ကတ်တေ။ မြီးအငယ်စွာကလဲ ကျောင်းအားတိုင်းလာကြည့်ရေ။ မြီးထဲမှာ သူ့ကိုတော့အချစ်ဆုံး အချေကပင် စီးပွါးရေး အဆင်မပြေလို့ ဖေချာ့ရှာနိန်ရရေ မုဆိုးမအမိထက် အဘောင်ရှင်နဲ့ရာ ကြီးပြင်းပါလတ်လို့ အဘောင်ရှင်ကို အမိထက်ပိုချစ်တေ။ တစ်သက်နဲ့တစ်ကိုယ် ဆေးရုံမတတ်ဖူးရေ ငါတစ်ယောက် ဆေးရုံမှာ ၁၂ရက်တောင်ရှိလားယာ။ တစ်ခါရာတတ်ဖူးရေ ဆေး၇ုံ နောက်ဆုံးတတ်ခြင်းဖြစ်တေလို့ ငါ့ကိုယ်ငါလဲ ယင်းခါမသိခ။ ဇာနိန့်ဆင်းရဖို့လဲလို့ မိန်းခီတိုင်း "အမိမှာ ဆရာဝန်က လုံးဝကျန်းမာစီချင်လို့နိန်ခိုင်းစွာ အိမ်မှာဆိုကေ ထိုလုပ်ဒေလုပ်နားခိုင်းလို့မရလို့ ဒေမှာနားခိုင်းစွာဆိုပနာ"တိကျရေ အဖြေကိုလဲမပီး။

ထွက်သင့်ရေ နိန်ရာကမထွက်ဘဲ ပါးစပ်ကရာ အပေါ့ပါ အလီးပါလားရေ မွီးခါစအချေတစ်ယောက်ကိုလဲ ၀မ်းခွဲရသိရေ။ သားဦးဖြစ်လို့ တပျင်းစိုးရိမ်နိန်ကတ်တေ ပေါက်တောက လင်မယားနှစ်ယောက်နဲ့လဲ ရင်းနှီးနိန်ကတ်ယာ။ GTC ကားမှောက်လို့ ဆေးရုံတင်ထားရေ ဆရာမတစ်ယောက်ကို လာကြည့်ကတ်တေကျောင်းသားတိနဲ့ ပြည့်နက်နိန်ရေ။ အော်မစည်ကားသင့်ရေနိန်ရာမှာ စည်ကားရေအထဲမှာ ဆေးရုံလဲအပါအ၀င်မနားယေ။ နာလို့ငိုရေလူ သီလို့ငိုရေလူ ပျော်လို့ငိုရေလူ အမျိုးမျိုးဖြစ်နိန်စွာကို ရုပ်ရှင်ကား တစ်ကားပိုင် ဆေးရုံက အခကြေးငွေတစ်ပြားလဲမယူဘဲနဲ့ ပြသနိန်ရေ။ စက္ကန့်နဲ့အမျှ ဒေလာကကြီးထဲကို ၀င်လာရေလူရှိရေပိုင် ထွက်လားခရေ လူတိလဲရှိရေ။ သံဝေဂတရား ဒေနိန်ရာကိုရောက်မ အားရပရ ကြည့်ရ မြင်ရ ခံစားရရေ။

မိုးထက ၀မ်းခွဲရဖို့လို့ ဆရာဝန်ကြီးပြောခရေ စကားတစ်ခွန်း ကြောင့်တစ်ချက်ချက်မှိုင်လားရေ သမီးချေမျက်နှာ ငါမမြင်အောင်မျက်ရည်ဝိုင်းတတ်တေ သမီးကြီးမျက်နှာ ဒေနိန့်မှနားလည်ရေ။ ၀မ်းအောင့်စွာလို့ပဲ အထင်နဲ့ အအီးဆဆေးဖြစ်နိန်စွာ လန့်လားခရေ။ အူမှာအနာတွီ့လို့ ၀မ်းခွဲပနာ ထုတ်ပလိုက်ဖို့ ကြောက်စရာမလို ကောင်းလားဖို့စွာလတ်။ ကောင်းလားဖို့စွာနဲ့ သူ့၇ို့တိမျက်နှာ ဇာဖြစ်လို့မကောင်းကတ်စွာလဲမသိ။ စကားတစ်ခွန်းမိန်းလိုက်တိုင်း စိတ်မကောင်းကတ်တေ သမီးတိမျက်နှာကိုမြင်ရစွာ ငါလဲစိတ်မချမ်းသာ။ နောက်ထပ်မမိန်းဖို့ ဆုံးဖြတ်ပလိုက်တေ။ ၀မ်းခွဲပြီးလို့ ၁၅ရက်မြောက်နိန့် ဆရာဝန်က တစ်ဖြည်းဖြည်းနဲ့ အနာက ကောင်းလားလိမ့်မယ်ဆိုပနာ ဇာမှာနားချင်လေ ဆေးရုံမှာနားချင်လာ အိမ်မှာနားချင်လာလတ်။ နိန်မကောင်းပင်ဖြစ်ဖြစ် နိန်ကောင်းရေပင်ဖြစ်ဖြစ် လူတိုင်း ကိုယ့်အိမ်ကိုယ့်ယာမှာရာ နိန်ချင်ကတ်စွာရာမနား။ အမိနက်ဖြန်ခါပြန်ကတ်ဖို့လို့ပြောရေ သမီးအသံ မျှော်လင့်ချက်မဲ့နိန်ရေပိုင်ကာ။

ဆီမီးစတာတစ်ခုပြီးတိုင်း ပြန်မလာဘဲ စစ်တွေမှာအင်္ဂလိပ်စာတတ်တေမြီးချေ ဒေတစ်ခေါက် အိမ်မှာနားချင်ရေ ဆိုပနာအရင်ပြန်လာလတ်တေ။ ခွင့်စေ့လားကေတောင် ကျောင်းမတတ်ဘဲ အမိနားမှာရာ တစ်ချိန်လုံး ပြုစုနိန်ရေသမီးငယ် တရားခွေတိ တစ်ခွေပြီးတစ်ခွေ ဖွင့်ပနာ အမိနားလည်အောင်ရှင်းပြနိန်ရေ စီးပွါးရေးရာအရေးကြီးေ၇လို့ပြောရေသမီးလတ် ရွာကမိသားစုကို ပစ်ပနာလိုက်လာရေသမီးကြီးရို့တိက မခံမရပ်နိုင်အောင်ထိုးအောင့်လာရေ ဒေ၀ဒနာကိုပျောက်ကင်းစီရေ။ အမိမသိအောင် ဟန်ဆောင်နိန်ကတ်တေသူ့ရို့တိသောက ငါမသိဘဲနဲ့ နိန်ဖို့လား။ ငါနင်ရို့ကိုမွီးပီးလိုက်တေလူ။ နင့်ရို့ထက် ထမင်းအရင်စားရေလူ။ နင်ရို့ပိုင် စာတတ်ပီတတ် မဟုတ်ကေ့လေ့ ခံစားနိန်ရရေ ငါ့ရောဂါ ညဉ့်ခါတိုင်ကေ တရားမှတ်လို့မရလောက်အောင် ဆိုးရွားရေ ဒေနာကြင်မှု ဇာအတိုင်းအတာကို ရောက်နိန်လေဆိုစွာကို ငါမသိဘဲနဲ့ နိန်ဖို့လား။ ငရဲဘုံအလားခံစားနိန်ရရေ ရင်ဘတ်က ဝေဒနာကိုမျက်ကွယ်ပြုပနာ အီးချမ်းရေ သုခဘုံဖြစ်အောင် နင်ရို့တိဖန်ဆင်းနိန်ကတ်တေ။ ငါ့ရောဂါ ဇာအဆင့်လဲ ဇာရောဂါလဲဆိုစော်ကို နင်ရို့တိမပြောကေ့လေ့ ငါသိရေ။ " အူမကြီးကင်ဆာ နောက်သုံးလရာနိန်ရဖို့ "ငါအိပ်နိန်ရေ ထင်ပြီးကေ အိမ်အောက်မှာအဖကို တတိုးချေပြောနိန်စွာကို နားထောင်ဖို့မလို့ဘဲ အလိုလိုကြားခမိရေ၊ ငါမကြောက်ပါဘူး အသက် ၇၃နှစ်ထိနိန်ပြီးယာဝေါ။ သောကတိကိုဖုံးပြီးကေ နိန့်မအား ညမအား ပြုစုနိန်ကတ်တေ နင့်ရို့တိကိုအားနာမိရေ။ ငါ့သားသမီး ဆွေးမျိုးအသိုင်းအ၀ိုင်းတိ နာကြင်အောင်လုပ်မိန်ိန်ယာမလားကု။

အချိန်တိတစ်ရက်ထက် တစ်ရက်ကုန်ပါလတ်တေ။ ထမင်းစားလို့မ၀င်လို့ ပိုက်နဲ့သွင်းရရေ။ ဆေးမှုသမက်က မနာအောင်လို့ ထိုးပီးရေဆီး မတိုးနိုင်ယာ။ အသီးကြိုက်တေငါ့ကို မြီးချေက အသီးဖျော်၇ည်ဆိုပနာ အမြဲတမ်းလာခွံရေ သူ့မျက်လုံးချေမှာလဲ မျက်ရည်တိဝိုင်းနိန်ကတ်တေ။ အစာစားဖို့ကြောက်ရွံလာရေ အစာမျိုချတိုင်းနာကြင်ရေဒဏ်က ဒေအစာအာဟာရ ဇာကိုလားပနာ အားဖြစ်ဖို့သိလဲ။ မသီခင်ကပင် အပုပ်ကောင်ဖြစ်နိန်ရေ ငါ့ကိုယ်လဲ ဟိုဘ၀က ဇာမကောင်းမှုလုပ်ခလေမသိ။ အစာလဲမစား ရီလဲမသောက် မျက်လုံးတောင်မဖွင့်ချင် ဖြစ်ချင်စွာဖြစ် မျောပလိုက်ချင်ယာလို့ ခံစားနိန်ရရေ ဝေဒနာကို မထိမ်းနိုင်ဘဲ ဆောက်တည်ရာမရာပြောမိရေ။ ဗြုန်းခနဲ့ငိုချလိုက်တေ သမီးချေ ဇာခါကပင်ထိမ်းထားလဲမသိ အနားကထွက်ပြီးလခရေ။ အော်ဘ၀ ဘ၀ လူ့ဝစော် မျက်၇ည်နဲ့စပြီး မျက်၇ည်နဲ့ဆုံးရေဆိုစော် ငါကိုယ်တွီ့ရာမနား။

Wednesday- ဒေနိန့်မြီးချေက သူ့အဘောင်ရှင်အနားမှာ အိပ်ဖို့လို့ မထွီးမတိကို ပူဆာနိန်ရေ။လူကြီးတိရှိလို့ ဒေမြီးချေကို တစ်ခါလဲ စောင့်အိပ်ဖို့မခိုင်း။ စကားပြောဖို့ ပါးစပ်တောင်မဟနိုင်ကေ့လေ့ အသိစိတ်တော့ရှိသိရေ။ ရုပ်ရာရှိပနာ နာမ်မရှိေ၇ ငါ့အကောင်ဘေးမှာ နင် အဘောင်ရှင်သီဖို့စွာကို သိလို့ ဒေနိန်စောင့်အိပ်စွာလို့ မြီးချေကို ပြောလို့ရှိလီကတ်ဖို့လား။ အဘောင်ရှင်အနားမှာ ဒေနိန်တစ်ရက်စောင့်အိပ်ဖူးလိုက်တေ ငါကံကောင်းရေမနားယေလို့ မြီးချေထင်လို့ရှိဖို့လား။ ဘုရားတ၇ားအကြောင်းကိုရာပြောဆိုလို့ မြီးချေက သူ့မထွီးမနဲ့ တတ်သမျှမှတ်သမျှကို ပြောနိန်ရေ။ သူရို့ပြောရေ တရားအကြောင်း နားထဲ ၀င်လိုက် မ၀င်လိုက်နဲ့ လေဟာနယ်ထဲ မျောနိန်ရေ။ နောက်ဆုံးထွက်သက်ကို အကောင်းဆုံးရူထုတ်နိုင်ဖို့ ငါခံနိုင်ရည်ရှိသိ့လာ။ နောက်ဆုံးထွက်သက်က အရေးကြီးဆုံးလို့ တရားတိမှာ ငါနာဖူးရေ။ ဒေနာကြင်မှုတိက ငါ့စိတ်ကိုငါ ထိမ်းနိုင်ဖို့ နောက်ဘ၀ကူးကောင်းဖို့ ခံနိုင်ရည်ရှိဖို့သိလား။

အကျွန့်တွက်

- ကမ္ဘာကြီးကို မပြောင်းလဲခင် ကိုယ့်စွာကို အရင်ပြောင်းလဲကတ်မေ။
- မိဘမဲ့ကလေးဂေဟာ မတည်ထောင်နိုင်ခင် ကိုယ့်ရှီ့မှာ ငတ်ပြတ်နိန်ရေ အချေတစ်ယောက်ကို ထမင်းတစ်ထပ်ကျွေးပနာ နွီးထွီင်္းရေမျက်လုံးတိနဲ့ ကြည့်ကတ်မေ။
- တိုက်နဲ့ကားနဲ့ မိဘကိုမထားနိုင်ခင် ဖုန်းပုံမှန်ဆက်ပီးပါ။
- သားသမီးပါးမှာထားရေ မိဘတိရဲ့ ကောင်းစီချင်ရေ စိတ်က တစ်ခါတစ်လီ လောဘတိပါလားရေခါ အပြစ်တင်မိစွာကို မိဘနိန်ရာကနိန်ပနာ တစ်ခေါက် ၀င်ခံစားကြည့်ပါ။
- မခံမရပ်နိုင်နာကြင်နိန်ရေ အချိန်ခါ ငါပျော်ဖူးခရေ နောက်လဲပျော်ရဖို့သိဆိုစော်ကို တစ်ချက်ချေ မမိန့်ကတ်ပါကေ။
- ကိုယ်စားချင်စွာနဲ့ မစားရတိုင်း စိတ်မညီးညူဘဲ ထမင်းငတ်လို့ သီနိန်ကတ်တေ လူဦးရေ ဒေကမ္ဘာမှာ တစ်စထက်တစ်စ တိုးပါလတ်စွာကိ သံဝေဂရပါ။


- လောကမှာ ကိုယ့်ကိုယ် တစ်ယောက်ကလဲ မနိုပ်စက်နိုင် ကိုယ့်စိတ်က ကိုယ့်ကိုဖျက်စီးနိန်ရေ အဓိကတရာခံပါ။
- ကိုယ့်စွာကို မသာထာကေနိန်လီ တစ်ခြားလူကို ပီးကမ်းဖို့ လက်မတွန့်ပါကေ့။
- မျှော်လင့်ချက်တိ ပျောက်ဆုံးနိန်ရေခါ တစ်ခုကိုလဲ မစိုင်းစားဘဲ တရေးအိပ်ပလိုက်ပါ။
- အနားမှာတစ်ယောက်လဲမရှိလို့ ၀မ်းနည်းနိန်ရေခါ အော်ငါ တစ်ယောက်တည်း ရပ်တည်နိုင်ယာမလားယေလို့ ထအော်ပလိုက်ပါ။
- မျက်လုံးမမှိတ်ခင် မေတ္တာပို့ပနာ စိတ်ကောင်းစေတနာကောင်းရှိပါစီ မိုးလင်းခါ အကွန့်ရို့တိ မျက်လုံးဖွင့်နိုင်ဖို့လို့ တစ်ယောက်လဲ အာမခံမပီးနိုင်ပါ။
- ဒေနိန့် အနည်းဆုံး လူတစ်ယောက်ကို ငါအကူညီပီးနိုင်အောင်ကြိုးစားဖို့လို့ အိပ်ရာကမထခင် ကြုံးဝါးပါ။
- လူပါးက တစ်ခုခုရဖို့ မျှော်လင့်မိရေ စိတ်ဝင်လာတိုင်း ငါတောင်လိုချင်သိ့ကေ ယင်းလူတိက ပိုပနာလိုချင်စိတ်ရှိဖို့ဆိုစွာကို မှတ်ထားပါ။
- မလှမ်းနိုင်ရေ တနိန့် ငါဇာပိုင်ထခရေဆိုစွာကို ပြန်ပနာ အတွက့်ပေါ်လိုက်ပါ။

စကားစု

၁။ လူငယ်တိမှာ ဇာခေတ်မဆို ရူးကတ်စွာတိ အပြစ်တင်စရာတိရှိကတ်စွာဗျာလ်။ ယကေလေ့သော လိမ္မာရေဆိုရေ လူကြီးလူမိုက်တိနဲ့ အနီးကပ်ပေါင်းရလီ ရူးကတ်မိုက်ကတ်တေဆိုရေ လူကြီးလူကောင်းအချေတိက ပိုပနာကြည်ညိုဖို့ကောင်းလာလီ။

၂။ ပြသာနာကို ဖြေရှင်းဖို့တွက် နားလည်မှုနဲ့ အခြေခံစတင်ရေ ဆီးထက်သာရေဆီးမရှိ။

၃။ လူငယ်တိ အတွေးအကြံကို လူကြီးအမြင်နဲ့ ကြည့်လို့ဂျေးယာ အပြစ်တင်လို့မဖြစ်သိ့။ ကိုယ့်စွာကိုယ် လူငယ်တိ နေရာက ၀င်ပနာဆန်းစစ်ကြည့်ဖို့ လိုအပ်သိရေ။

၎။ ဟိုဘက်ကိုလဲ မကူးနိုင်။ ဒေဘက်ကိုလဲ မကူးနိုင်။ ခြားနားထားရေ ခြံစည်းရိုးမှထိုင်ပနာ စိတ်ပျက်နိန်ကေ ဇာကံကောင်းမှုတိလဲ အနားကို ကပ်မလာနိုင်ပါ။

၅။ တစ်ခြားလူကို အာဏာရူးလတ်။ ကိုယ်ကိုယ်တိုင်ကလဲ အာဏာကို ရီငတ်တေပိုင် ဆာလောင်မွတ်သိပ်နိန်ရေ။ ဇာသူ့ကိုလားပနာ ယုံကြည်ရဖို့သိလဲယေ။

၆။ ရောဂါတစ်ခုရဲ့ အခြေအမြစ် အသွယ်သွယ်ကို နှိုင်းချိန်စိစိစ် ပိုင်းခြားပြရေ ဆရာဝန်ရဲ့ အစီရင်ခံစာထက် မျက်စိတစ်မှိတ် လျှပ်တစ်ပြတ်အတွင်း ရောဂါစွဲကို ဒက်ခနဲ အမည်ပီးတတ်တေ ပယောဂဆရာရဲ့ စကားကို ပိုမိုယုံကြည်ကတ်တေ။

၇။ ဒေကုခေတ်မှာ ဖြေရှင်းဖို့နည်းလမ်းကို အရင်ပိုင်လမ်းဟောင်းမလိုက်ဘဲ ဖြတ်လမ်း ဆီးမြီးတိုလမ်းစိုင်ကိုရာ ပိုပနာသဘောကျလာကတ်ဗျာလ်။

၈။ ဒေကြိုးကိုလွှတ်ပနာ မမြင်မစမ်းလှမ်းကေ ချောက်ကမ်းပါးကို ကျဖို့လားမသိ။ မလွှတ်ဘဲနဲ့ တွယ်ကတ်နိန်ကေလဲ ဒေအမှောင်ထဲက တစ်သက်လုံး ရုန်းမထွက်နိုင်ဗျာလ်။

၉။ လူ့လောကမှာ ကိုယ်ဘ၀မှာ ကိုယ်ပျော်နိုင်ဖို့က အရေးကြီးဆုံး။

၁၀။ မရနိုင်စွာကို တောင်းတမိရေပိုင် ရနိန်စွာနဲ့လဲ မတင်းတိမ်နိုင်ခြင်းရေ စိတ်ဆင်းရဲခြင်း စစွာ အကြောင်းအရာတစ်ခုဖြစ်တေ။


ညီမလေးရယ် စိုးရိမ်မိတယ် (တက္ကသိုလ်ဘုန်းနိုင်)- စာအုပ်က နှစ်သက်မိရေ စကားစုချေတိကို ကူးယူထားခြင်းဖြစ်ပါရေ....

အမောင်

ဘ၀ဆက်တိုင်း ဒေ၀ဒနာဆိုးနဲ့ ကင်းကင်းရှင်းရှင်း နိန်ရပါစီ...











အိပ်မပျော်ရေညဉ့်တိ
အမောင့်ဂီတာသံနဲ့ ပျော်ဝင်နိန်ခဖူးရေ
နှစ်တစ်နှစ်ကုန်ဆုံးတိုင်း Happy New Year လို့ အတူတူအော်ပနာ
လိုချင်ရေဆုတစ်ခုစီ တောင်းခကတ်တေ
လုံးဝဖြစ်မလာရေ ကိုယ့်အိပ်မက်ချေကိုလက်ခံဖို့ကြိုးစား
ပပျော်ရွှင်ရွှင်နဲ့အမောင်ရို့ နှစ်ယောက်ကို
မုဒိတာပွါးနိုင်အောင် အချိန်တိဇာလောက်ပီးဆပ်ရဖို့လဲ ...

အကျွန်နာကြင်အောင်လို့ အမောင့်အချစ်တိကို
ဥပေက္ခာတရားနဲ့ သတ်မှတ်ခစွာလား
ထင်းက မီးကိုချစ်တေပိုင်
အမောင့်ကိုချစ်မိရေ သံယောဇဉ်တိက
အကျွန့်ကို အကျွန်လောင်ကျွမ်းမိနိန်ဗျာလ်...

တစ်ယောက်က အားလျှော့နိန်တောင်
ဘ၀ဆုံးရေထိငါရို့တိ တစ်ယောက်လက်ကိုတစ်ယောက်
နနှောင်းဆွဲထားကတ်မယ်
တွဲလတ်မဖြုတ်တမ်းလို့ ကတိတူတူပီးခစွာ
ဓါးလှံတိထက် အစွမ်းထက်တေ
ခံစားချက်မဲ့နိန်ရေ မျက်ဝန်းတစ်စုံအောက်မှာ
အမောင့်လက်ကိုအားဓမ ကိုင်ထားရေအကျွန့်လက်တိ
အင်းအားတိကုန်ခမ်းလားဗျာလ်....

အလွမ်းတိနဲ့ ဒီဇင်ဘာ

တစ်ရက်ပြီးတစ်ရက်ပြီးနဲ့ တစ်နှစ်ကုန်ဖို့နီးပါလတ်ယာ။ ကိုယ့်ရွာမှာခါ ပုဆိုးထဲမှာခေါင်းကိုဝှက် ခန်ထာကိုကုတ်နိုင်သမျှကုတ်ပနာ အအီးဒဏ်ကို အံတုန်နီခရရေ။ ရီခြားမြီခြားမှာ အေးကွန်နဲ့ ဖန်တီးပနာ ရိုက်ခတ်လာရေ အအီးဓါတ်ကို ငါ့ရို့တိ ခံစားနိန်ကတ်ရရေ။ အတုတကာ့ အတု ဒေအအီးတုလောက်တော့ ပျင်းတောင်ပျင်းသိ့ရေလို့ ပြောပလိုက်ချင်ရေ။ အိမ်ကထွက်တေ ဆိုလောက်ကပင် အတုတိဇာလောက် ကြုံပြီးယာလေမသိ။

တစ်ချို့တိကစကားကို ပျားရည်တောင် ရှုံးပါလားအောင် ချချိုသသာနဲ့ ၀ါပြောကတ်တေ။ တစ်ချို့တိက မဲ့ချင်နိန်ရေစိတ်ကိုထိမ်းပနာ အပြုံးတုနဲ့ပြုံးပြကတ်တေ။ တစ်ချို့တိက လူပါးအထင်ကြီးခံရဖို့ ရင်ထဲကမပါဘဲနဲ့ ကြီးကျယ်မြင့်မြတ်တေဆိုရေ အလုပ်တိကို သူ့ရို့အတ္တတွက်လုပ်ကတ်တေ။ တစ်ချို့တိက ကိုယ့်လောဘကို မကွယ်နိုင်ဘဲ ရိုးသားဟန်ဆောင်ကတ်တေ။ အကျွန်တော့ခါ ဒေချင့်ထက်ဆိုးရေအတုတိကို လုပ်တေအထဲမှာပါနိန်ရေ။ ဆောင်းအငွေ့အသက်တိနဲ့ အီးမြနိန်ရေနှင်းကို မခံစားရဘဲ ဒီဇင်ဘာအတုနဲ့ကြုံရစွာ ၆နှစ်မြောက်ဖြစ်လခဗျာလ်။ နောက်ထပ် ဇာလောက်ထိ မင်းကိုယ်ငွေ့အစစ်အမှန်ကို မြင်ရဖို့လဲ ဒီဇင်ဘာ......

အခွင့်ကြုံရေတစ်နိန် ဆောင်းရာသီရောက်တိုင်းပွင့်နိန်ကျ ငါ့အိမ်ရှီ့က တောဇလပ်ပန်းတိကိုဆွတ်ပနာ အချေခါပိုင် ဆရာမကိုလားပနာပီးချင်ရေ။ မိုးထဖက် လေးနာရီကပင် အိမ်နောက်ဖေးမှာ မီးလှုံနိန်ရေ အဘိုးရှင်နဲ့အဘောင်ရှင် ကြာနီကန်အရှင်ဘုရားဟောရေ ဓာရဏပရိတ်တော် အသံကိုဒေကုထက်ထိ ငါမြင်ယောင်နိန်တုန်း ငါကြားနိန်တုန်း။ ဒေပိုင်လှပရေ မြင်ကွင်း ပြည့်ပြည့်စုံစုံ ငါမမြင်ရဗျာလ်။ လောကကြီးက စစောစစီး ထွက်လားခရေအဘောင်ရှင်ကို အအီးချချမ်းရှိပါစီလို့ မီးဖိုဘေးမှာလဖက်ရည်သောက်ပနာ  တစ်ယောက်တည်း မေတ္တာပို့လို့ အဘိုးရှင် ရှိနလီဖို့လား။ မြို့ပြဒီဇင်ဘာကို မုန်းပါရေ အဘိုးရှင် .......

ချမ်းကေ ရီပူချိုးဖို့ Heater တိအဆင်သင့်ရှိနိန်ရေ နိန်ရာကနိန် နီပူခံပနာချိုးရရေရီကို ဒီဇင်ဘာရောက်တိုင်း အောက်မိန့်ပါရေ။  နှစ်သစ်တွက် နှစ်အဟောင်းကို လက်ပြရဖို့ယာ။ နှစ်တစ်နှစ်ကြီးလာရေပိုင် ငါ့ရို့တိလဲ အသက်တိကြီးပါလတ်ကတ်တေ။ လုပ်ခသမျှအမှားတိကို ပြန်ပနာသုံးသပ်ပြီးကေ အကောင်းဆုံးကိုလုပ်ဖို့  ဆုံးဖြတ်ချက်တိချ။ ချမ်းအီးလှရေ ဒီဇင်ဘာကို ငါ့ရို့ အလွမ်းတိနဲ့ ဖြတ်ကျော်ကတ်ရဖို့သိ........

အားကျစရာလား

လစာလဲများ နေရာတကာဝင်ဆံပနာ
လူတိပါး အထင်ကြီးခံရလို့ 
ရာထူးငယ်ရေလူက ရာထူးကြီးရေလူကို 
အားကျရေလတ်
တစ်ချက်မှားဖို့မရ ထိုကဒေက
ဝေဖန်ဖို့စောင့်ကြည့်နိန်ကတ်တေ
မျက်လုံးအောက်မှာ နိန်ရရေ 
သူရို့တိ စိတ်ဖိစီးမှုတစ်ပိသာကိုမမြင်
ဒေချင့်က အားကျစရာလား....... 

အသားညိုလူက ဖြူရေလူကိုလှေ၇ထင်
ဖြူရေလူက ညိုရေလူမှ အလှစစ်ထင်
အရပ်ပုရေလူက ရှည်ရေလူကိုအားကျပြန်
ရှည်ရေလူက ရှည်အားကြီးလို့ မကြိုက်ကာ
အရုပ်ဆိုးရေလူတိက အရုပ်လှရေလူပိုင်ဖြစ်ချင်ပြန်
လှရေလူက လူတကာဝိုင်းကြည့်ကတ်လို့ 
အရုပ်ဆိုးရေလူကို သဘောကျပြန်ယာ
ဒေချင့်တိက အားကျစရာလား..........

မတရားလုပ်နိန်စွာကိုမမြင် ချမ်းသာစွာကိုရာကြည့်
ဆင်းရဲသားတိရင်မှာ ချမ်းသာချင်ရေစိတ်က မဖုံးနိုင်မဖိနိုင်
လောဘသားကောင်တိကလဲ မတရားရရေ ဖေချာ့တိနဲ့
ချမ်းသာနိန်ရရေ သူရို့ဘ၀ ကိုယ့်အရိပ်ကိုယ်မလုံ
ထမင်းနပ်မှန်အောင်စားဖို့ ပင်ပင်ပန်းပန်း လုပ်စားနိန်ရရေ
ဆင်းရဲသားလူတန်းစားတိကို အားကျပြန်
(နောက်မှတရေ နောင်တ ကျွဲပါးစောင်းတိရေပိုင် အလကားရာ)
အော်ဒေချင့်တိက အားကျစရာလား........

အဖရခိုင်ပြည်မှာရှိရေလူက နိုင်ငံခြားမှာနိန်ရေလူကို 
အားကျပြန် မင်းဘ၀ကရီကြိုင်ရာမြက်နုရာမှာ
ကကောင်းတိုးတတ်နလီယင့်လတ်
မွီးရပ်ဌာနိန်ကို စွန့်ခွါ
ရင်ထဲကနာကြင်မှုတိကို ကြိတ်မှိတ်ခံပနာ
ဇာမှာလေ အိမ်ကပီးရေနွီးထွီးမှု 
အရောင်တောင်ဖမ်းမတွီ့
ဒေချင့်ကအားကျစရာလား..........

အော်လူတိ ကိုယ့်တန်ဖိုးကိုယ်မထား
ပိုင်ဆိုင်ရေ အရာဝတ္ထုကို မြတ်နိုးရကောင်းမှန်းမသိ
လူတကာမှာရှိရေ ပစ္စည်းကိုမှ 
လိုချင်ကတ်တေ အားကျကတ်တေ
ဒေချင့်က အားကျစရာလား.....

ခတ္တလူ့ပြည် (၁)

 
10/4/2010 ပထမဆုံး ဆယ်ရက်တရားစခန်းက ရခရေ အတွီ့အကြုံတိပါရာ။ စိုင်းစိုင်းရှိုးပွဲနဲ့ တရားစခန်း နှစ်ခုကြား လွန်ဆွဲမိရေစိတ်ကို အကျွန်နိုင်အောင် ထိမ်းနိုင်ခလို့ ဒေကုပြန်စိုင်းစားလိုက်တေခါ ကကောင်းဂုဏ်ယူမိရေ။ အိပ်ရာဝင်ဖို့အချိန်တိုင်း ဒံပေါက်စားချင်ရေလို့အော်နိန်ခရေ အကျွန့်မရင့်ကျက်ခပါ။ ဘုန်းကြီးကျောင်းက စားသောက်ဆိုင်နဲ့ကပ်ပနာရှိနိန်ရေခါ တေးခြင်းရူးအကျွန် ယောဂီဆိုရေ ကုနြေ္ဒကိုမထိမ်းနိုင်ဘဲနဲ့ တေးခြင်းတတိုးချေ လိုက်ဆိုမိခရေ။ အခန်းက အပျိုကြီးမမရို့ကလဲသော့ အငယ်ဆုံးဖြစ်လို့ အလိုလိုက်ခကတ်။ စင်္ကြန်လျှောက်ချိန်မှာ မုန့်ထ်ိုင်စားနိန်စွာကို ဆရာတော်တွီ့လခလို့ မိုက်နဲ့အော်ပနာ "အပျိုကြီး အခန်းကမမများ စင်္ကြန်ချိန်မှာ မုန့်မစားရ" လို့ဘုန်းကြီးကျောင်းတစ်ခုလုံးကြားအောင် အအော်ခံခဖူးရေ။ တရားထိုင်တိုင်း ဒုက္ခ ငရဲပိုင် နာကြင်မှုတိကို သည်းမခံနိုင်လို့ အော်ပလိုက်ချင်ရေ စိတ်တိကို မနည်းထိမ်းခရရေ။ မိုးထဖက် ၄နာရီကပင်ထပနာ တရားနာရေအချိန်တိုင်း အိပ်ငိုက်နိန်စွာကတောင် ဆရာတော်လာလား မလာလားဆိုစော်ကို ခိုးကြည့်ရစွာလဲ အလုပ်တစ်လုပ်ဖြစ်နိန်ခရေ။ ပြန်ပနာစိုင်းစားလိုက်ကေ အော်ဇာပင်ပြောပြော ငါလိမ္မာခဖူးရေမနားယေလို့ ဒေကုထက်ထိ ကိုယ့်စွာကို ပီတိဖြစ်မိရေ။

လူတိပြောကတ်တေ ခတ္တအမေရိက ခတ္တ စင်ကာပူမှာ အကျွန်ရှိမနိန်ပါ။ ခတ္တလူ့ပြည်ဆိုရေ နိန်ရာမှာ အကျွန်ရောက်နိန်လို့ ဒေခေါင်းစိုင်းချေကို ယူသုံးမိပါရေ။ ဘုရားရှင်ပြောခရေ ခတ္တလူ့ပြည်က အဓိပါယ်မတူပါ။
ခတ္တကို တန်ဖိုးရှိရှိ အသုံးချတတ်ဖို့ အရေးကြီးပါရေမနားယေ။
အကျွန် မသိပါ မတတ်ပါ။ ကြားဖူးသမျှ နာဖူးသမျှ ၀ီမျှမိစွာပါ။ ဆယ်ရက်တရားစခန်းမှာ ၀ိပသာနာ စက်ဝိုင်းအကြောင်းကို အဓိကထားပြီး နာခရပါရေ။

ကိုယ်နာချင်ကေနာ စိတ်မနာအောင် ကျင့်ရပါဖို့လတ်။ ဟုတ်တေ တရားထိုင်လို့ ကိုယ်နာလေကေ နာရေနိန်ရာကို ရူရေရူရေ မရဆိုကေ ဒေါသတိထွက်ပါလတ်တေ။ ယင်းချင့်က ကိုယ့်စိတ်ကိုနာအောင် လုပ်နိန်စွာပါလတ်။ ရူလို့နာကေ ဒေါသမထွက်ပါကေ့။ လာရေစိတ်ကိုရူ လောဘလာကေ လောဘ(တဏှာ)။ အားလုံး မမြဲရေသဘော (အနိစ္စ)။ သတိလျော့နိန်ဖို့ မကြိုးစားဘဲနဲ့ နိန်ဖို့ဆိုကေ ရထားတိပိုင် အချိန်မှန် ဒေဒုက္ခသံသရာစက်ဝိုင်းက လွတ်လီဖို့မဟုတ်ပါဗျာလ်။
ဒုက္ခသစ္စာဆိုရေ ဒေခန်ဒါကို နောက်ထပ်မရအောင် စက်ဝိုင်းပြတ်အောင်ဖြတ်ရဖို့။

နတ် လူဗြဟ္မာ ဘ၀ကို တောင့်တစွာက ဒုက္ခရပါလို၏ အိုရပါ၏ နာရပါ၏ ဆိုရေ ဆုကိုတောင်းစွာနဲ့တူတူပါဗျာလ်။ ကိုယ်ရုပ်ဆိုးကေ ကိုယ်မြင်အောင်ရူရဖို့။ လောဘ ဒေါသ မာနတိကို လက်ကိုင်ထားလို့ ဇာဖြစ်ဖို့လေယေ။ ရုပ်ဆိုးကေလဲ အသီကောင် အပုပ်ကောင် ရုပ်လှကေလေ့ အသီကောင် အပုပ်ကောင်။ အပုပ်ကောင်အချင်းချင်း လက်ထပ်ကတ်တေ သီကေငိုကတ်တေ။ သံသရာ ဒုက္ခစက်ဝိုင်းကြီးထဲမှာ တဏှာကြောင့် ရရေလောဘတိကို လိုချင်တပ်တပ်မက်မက်နဲ့ လုယူနိန်ကတ်စွာကို အရာစွာနဲ့ မရူ့ကေ ဖြစ်ပျက်နဲ့ရာရူ့ရပါဖို့။

သမုဒယသစ္စာကြောင့်ရလာရေ ခန်ဒါကို အကျွန့်ရို့တိ တွယ်ကပ်နိန်ရေအတွက် ဒုက္ခသစ္စကို အကျွန့်ရို့တိ သိနိန်ကတ်စွာ။ ယင်းနဲ့လို့ မအိုချင်ကေ့လေ့ အိုကတ် မနာချင်ကေ့လေ နာကတ်။ အေးခန်ထာတိက ဇာသူ့ပိုင်ရေ ခန်ထာလေ။ အကျွန်ရို့တိပိုင်ရေ ခန်ထာဖြစ်လို့ မစွန့်ပယ်နိုင်သမျှ ညဏ်ဆောင်ထားရေ ဒေအသုဘလောင်ကြီးနဲ့ နပန်းလုံးကတ်ရဖို့စော်ရာ။ စိတ်ဆောင်ထားရေ ဒေအကောင်ကြီးမှာ ဇာတိက တပ်မက်စရာရှိလို့ သာယာနိန်ကတ်လေမသိ။ ဒေကုခံစားနိန်ကတ်တေ နာကြင်ရေ ဒုက္ခသစ္စတိကို အတိတ်ဘ၀က ဇာသူတိ ဆုတောင်းခကတ်လို့လဲ။ အကျွန်ရို့တိ မနားယေ။ အ၀ိဇ်ဇာတိဂျေးယာ ဖုံးလွှမ်းနိန်ရေ အကျွန့်ညဏ်ကြောင့် သင်္ခါရတိပြုလုပ်ကတ် မြင်ကေလိုချင်ရေ ဝေဒနာတိ ဖြစ်ကတ်ပြန်ယာ။ ယပိုင်ဆိုကေ ပြောစရာမလို တဏှာဆိုရေ သမုဒ္ဒယသစ္စာ လာဖို့သိ။ ဒေဘ၀သာယာချင်လို့ တစ်သံသရာလုံး ခံနိန်ကတ်ဖို့လား။

မမြဲလှရေ အနိစ္စတရားကို အကျွန်ရို့တိသိနိန်ကတ်စွာပဲ။ ဇရာမရဏ ဆိုစော်ဇာလေ အကျွန်ရို့တိ သိနိန်ကတ်စွာရာမနား။ ဇာအတွက်နဲ့ လူ့ချမ်းသာ နတ်ချမ်းသာ ဗြဟ္မာချမ်းသာကို လိုချင်တောင့်တမှုတိနဲ ဆုတောင်းနိန်ကတ်ရလေ။ ခန်ထာရကေ ဒုက္ခသစ္စာ ရဖို့စွာကို သိနိန်ကတ်စွာရာမနား။ သူရို့တိမှာလဲ နတ်အို နတ်နာ နတ်သီ။ လူမှာလဲ လူအို လူနာ လူသီ။ ဗြဟ္မာမှာလဲ ဗြဟ္မာနာ ဗြဟ္မာအို ဗြဟ္မာသီ ဆိုစွာရှိစွာပဲ။ ယင်းနဲ့လို့ ဆုတောင်းမမှားဖို့ အရေးကြီးပါရေ။

ဆက်ရွီးပါဖို့သိ....

အီးချမ်းခြင်းတရား

ငြိမ်းချမ်းစွာ နိန်ထိုင်နည်း-

၁။ သူတစ်ပါးတိ ကောင်းကျိုးချမ်းသာကိုလိုလားရေ မေတ္တာစိတ်ဓါတ်ရှိစွာ။
၂။ ကိုယ့်ထက်ဆင်းရဲရေ လူတိပါးမှာ သနားကြင်နာတတ်ရေ ကရုနာစိတ်ဓါတ်ရှိစွာ။
၃။ ကိုယ့်ထက်ချမ်းသာရေ လူတိပါးမှာ ကြည်ဖြူဖြူနဲ့သဒ္ဒါတရားပွါးနိုင်ရေ မုဒိတာစိတ်ဓါတ်ရှိစွာ။
၎။ ဇာပင်ဖြစ်လာဖြစ်လာ ကံတရားကြောင့်ရာဆိုပနာ အလယ်အလတ်လမ်းစိုင်ဖြစ်တေ ဥပက္ခာစိတ်ဓါတ်ရှိစွာ။

ဒေပိုင်စိတ်ဓါတ် မွီးလာခကပင် ပါမလာကေတောင် တဖြည်းဖြည်းနဲ့ပြုပြင်ယူလားပနာ ဘ၀ကိုအီးအီးချမ်းချမ်းဖြတ်သန်းလားနိုင်ပါရေ။
ဆရာတော်ဘုရားဟောကြားခရေ တရားတော်ထဲက ရလာရေ အသိတရားချေပါ။ ဘလော့ထဲမှာ မျှဝီပါရေ။

(ချမ်းမြေ့ဆရာတော်ဘုရားကြီး) Dhama Talk on 3/12/2011 Satarday At Toa PaYoh Monestery

Quote

1.In this life we cannot do great things, we can only do small things with great love. (Mother Teresa of Calcutta)

2.The Death never drops any hints.

3.Publicity is the easy thing but popularity is the hard one.

4.The lack of experience makes impatience.

5.Everybody measures things with the yardstick of his own views.

6.Such a large of money are nothing for someone who knows that we will be naked the end of life.

7.There are a lot of fair-weather friends in our life. Please try to save their life. If we cannot do, just neglect them.

8.We are not only the black sheep but also the white elephant if we waste our time.

9.There is no service to repair the regrets.

10.Please respect yourself.

လူ့ဘ၀၏ အကြီးမားဆုံး အသိတရား (၁၄) ချက်

၁။ လူ့ဘ၀၏ အကြီးမားဆုံး ရန်သူရေ မိမိကိုယ်တိုင်ဖြစ်တေ။

၂။ လူ့ဘ၀၏ အကြီးမားဆုံး ဆုံရှုံးခြင်းရေ မိမိ၏မာနကြောင့်ဖြစ်တေ။

၃။ လူ့ဘ၀၏ အကြီးမားဆုံး အသိမဲ့ခြင်းရေ မိမိ၏ကိုယ်ကိုလိမ်လည်နေခြင်းဖြစ်တေ။

၎။ လူ့ဘ၀၏ အကြီးမားဆုံး ၀မ်းနည်းခြင်းရေ မိမိ၏မနာလိုဝန်တိုစိတ်ကြောင့်ဖြစ်တေ။

၅။ လူ့ဘ၀၏ အကြီးမားဆုံး မှားယွင်းခြင်းရေ မိမိ၏စိတ်စိတ်ဓါတ်ကျဆင်းခြင်းပင်ဖြစ်တေ။

၆။ လူ့ဘ၀၏ အကြီးမားဆုံး ပြစ်မှုပြုခြင်းရေ မိမိ၏အနိုင်ကျင့်လိုရေစိတ်ဓါတ်ကြောင့်ဖြစ်တေ။

၇။ လူ့ဘ၀၏ အကြီးမားဆုံး သနားစရာကောင်းခြင်းရေ မိမိ၏စိတ်အားငယ်မှုဖြစ်တေ။

၈။ လူ့ဘ၀၏ အကြီးမားဆုံး လေးစားခံရခြင်းရေ မိမိ၏စိတ်ဓါတ်ကြံခိုင်ခြင်းဖြစ်တေ။

၉။ လူ့ဘ၀၏ အကြီးမားဆုံး စီးပွါးပျက်ရခြင်းရေ မိမိ၏ကိုယ်ပိုင်အနာဂါတ် မျှော်လင့်ချက်ကင်းမဲ့ခြင်းကြောင့်ဖြစ်တေ။

၁၀။ လူ့ဘ၀၏ အကြီးမားဆုံး ချမ်းသာခြင်းရေ မိမိ၏ကျန်းမာရေးကောင်းခြင်းဖြစ်တေ။

၁၁။ လူ့ဘ၀၏ အကြီးမားဆုံး အကြွေးသံသရာဖြစ်ခြင်းရေ လူမှုရေးကြွေးသံသရာဖြစ်တေ။

၁၂။ လူ့ဘ၀၏ အကြီးမားဆုံး လက်ဆောင်မွန်သည် မိမိ၏သည်းခံခွင့်လွှတ်တတ်တေ စိတ်ဓါတ်ပင်ဖြစ်တေ။

၁၃။ လူ့ဘ၀၏ အကြီးမားဆုံး လိုအပ်ချက်ရေ မိမိ၏အကြင်နာတ၇ားမေတ္တာစိတ်ဓါတ်ဖြစ်တေ။

၁၄။ လူ့ဘ၀၏ အကြီးမားဆုံး ပီတိသည် အလှုဒါနပြုခြင်းဖြစ်တေ။

(ပဲခူးကွမ်ရင်စီ ဘုရားကျောင်း ဓမ္မလက်ဆောင်)

အားတင်းထားပါဝေ

ညီမချေ

ငိုထားမှန်းသိသာရေမျက်လုံးတိနဲ့ ငါ့ညီမ အချေလဲမဟုတ် အမိကိုအောက်မိန့်လို့ ငိုထားရေဆိုဝေါ...
ဖျားလို့ အိမ်ကပီးရေ နွီးထွီးမှုတိကို တောင့်တပြီးကေငိုစွာကို နားလည်မိရေဝေ... အိမ်နဲ့ဝီးရေလူက ညီမချေတစ်ယောက်တည်း မဟုတ်ဆိုစော်ကို ခေါင်းထဲမှာထည့်ထားလိုက်နန်း...
တခြားလူတိ ဒေဝေဒနာကိုကျော်ဖြတ်နိုင်ကေ ညီမချေကလူထဲက လူမဟုတ်လား ရင်ဘတ်ထဲက နာကြင်မှုတိကို ခေါက်ထားလိုက်တစ်ချက်ချေ...
ထောထိုမှာ ညီမချေနိန်ချင်ရေအိမ် တစ်ရက်ပြီးတစ်ရက် နီးကပ်လာယာ အားတင်းထားပါဝေ...

လောကကြီးမှာ ညီမချေထက် ဆိုးရေလူတိအများကြီး မိဖမရှိရေအချေတိ ထမင်းနပ်မှန်အောင်မစားရရေလူတိ
အဘာ အမင်ဇာသူလဲဆိုစော်ကို မသိဘဲနဲ့ ကြီးပြင်လာရေ လူတိလဲ အများကြီး ကိုယ့်ဘ၀ကို ကိုယ်အားမငယ်ပါကေ့ဝေ...
လူတိုင်း ကိုယ်လောင်းချေကို ကိုယ်တတ်နိုင်သမျှ အားတင်းပြီးကေ လှော်နိန်ကတ်စွာမှာ ညီမချေ မလှော်ပဲနဲ့ ရပ်ပနာ ကျန်ဟိခဖို့လား
ကမ်းက မ၀ီးဗျာလ်ညီမချေ အားတင်းထားပါဝေ...

စိတ်ဓါတ်ကျရေ အချိန်တိုင်း အားငယ်ရေ အချိန်တိုင်း နိန်မကောင်းဖြစ်ရေ အချိန်တိုင်း မယ်မယ်နာမည်ကို အော်ပနာငိုဖို့လား အဘောင်ရှင်နာမည်ကို အော်ပနာငိုဖို့လား ငိုပါဝေ... ယကေ့လေ ဆီးသောက်ဖို့ အစာအချိန်မှန်စားဖို့တော့ မပျင်း မကြောက်ကေ့ ယေပြီးနာ အထီးကျန်လို့ ဆိုပြီးကေတော့ မငိုကေ့နန်း...
ချစ်ဖို့ကောင်းရေ မိသားစုက ညီမချေနားမှာ အမြဲတမ်းရှိနိန်စွာကိုတော့ မမိန့်စီချင်ဝေ သူရို့တိလဲ ညီမချေ ဒေ၇ီပြင်ကြီးကို အပြုံးနဲ့ရင်ဆိုင်နိုင်ရေဆိုပနာ တနိန်ရာက စောင့်ကြည့်နိန်ကတ်တေ သူ့ရို့နားကို ရောက်ဖို့ကောင်းမလိုဗျာလ် ညီမချေ အားတင်းထားပါဝေ...

ပြောစရာတစ်ခုကျန်ခသိရေ ညီမချေ ငိုကေအရုပ်ဆိုးရေ မငိုကေ့နန်း... ပန်းတကာ့ပန်းမှာ အပြုံးပန်းက အလှဆုံးပါဝေ... ယင်းပန်းချေကို ငါ့ညီမချေ အမြဲတမ်းပန်းဆင်နိုင်အောင်ကြိုးစား...
အိမ်လွမ်းရေ တေးခြင်းတိကိုဂျေးယာ နားမထောင်ကေ့နန်း... မီးလောင်ရာကို လီမပင့်ပါကေ့ဝေ ညီမချေ...

အားတင်းထားပါဝေ
အားတင်းထားပါဝေ
အားတင်းထားပါဝေ...

ခံစားချက်အတိုင်း ပုံဖေါ်နိုင်ပါရေ

စကားလုံးတစ်လုံးတည်းမှာ မတူညီရေအဓိပါယ်တိ အများကြီးနက်....


(၁၇.၁၁.၂၀၁၁ ကြာသပတေးနိန့်) မိုးထကပင် ကြားရရေသတင်းတစ်ခု တစ်ရက်လုံး ရင်ထဲမှာ ဆို့နလီရေ။ စင်ကာပူရောက် မြန်မာအပျိုမချေတစ်ယောက် တိုက်ထက်ကခုန်ချလို့ သီကြောင်းကြံလားရေလတ်။ ကြက်သီးတိ ဖြဖြန်းထလားရေ။ သီရေအကြောင်းကလဲ သူ့ရည်းစားထားပခလို့လတ်။ ညဉ့်ခါလဲအိပ်မပျော်လီ။ သူ့ချစ်တေ လူတစ်ယောက်ကြောင့် ဘ၀ကိုစွန့်ပနာ သတ်သီလားရေ။ သူ့ကိုချစ်တေလူတိ သူ့ကြောင့် ဇာလောက်ပူဆွေးနလီဖို့ဆိုစော်ကို သူကတော့ သိဖို့မဟုတ်ဗျာလ်။

အမိကမွီးပြီးကေ ဇာမဟုတ်တေ တစိမ်းယောက်ကျားတစ်ယောက်တွက် သတ်သီလားလို့ အပြစ်တင်ခံရရေ ယင်းမမကိုလဲ သနားရေ ဒေါ်သဖြစ်တေ ယူကျုံးမရဖြစ်မိရေ။ ဒေလူတိတွက် ယင်းယောက်ကျားက ဇာတစ်ခု မဟုတ်ကေ့လေ့ သူ့ဘ၀တစ်ခုလုံးကို တန်ဖိုးမထားဘဲ စွန့်ရလောက်အောင်ထိ သူ့တွက်အရေးကြီးလို့မနားယေ။ မိဘတိဇာပိုင်ခံစားရဖို့လဲ လုံးဝမစိုင်းစားခဘဲ အတွေးမှားတစ်ခုက နောက်ဘ၀အဖန်ငါးရာကိုစိန်ခေါ်ပနာ သူ့ဘ၀တစ်ခုလုံးနဲ့ လောင်းပလိုက်တေ။ ( အဖန်ငါးရာမှာ နောက်ဆုံးဘ၀ဖြစ်ပါစီလို့ ဆုတောင်းပီးပါရေ... )။ သူနာပြုဘွဲ့ သူများကိုကယ်ဖို့သင်ထားရေ အတတ်ပညာက အဆုံးမှာ သူ့ကိုမကယ်နိုင်ခ။

သမီးရည်းစားနှစ်ယောက် လမ်းခွဲလိုက် ပြတ်လိုက် ဒေချင့်က ငရုတ်ဆုံနဲ့ ကျမွီ့ပိုင် ခွဲထားလို့မရရေ အရာတိရာမနား။ ယင်းနဲ့လို့ သူချစ်တေ ယင်းယောက်ကျားမှာလဲ အပြစ်မရှိလို့ အကျွန်ထင်ရေ။ လူတစ်ရာမှာ 99% ကအချစ်ဦးနဲ့ ရကတ်စွာကမဟုတ်။ ဒေကုခေတ်မှာဆိုကေ ပိုတောင်ဆိုးသိရေ နှလုံးသားထက် ဦးနှောက်ကို ပိုစိုင်းစားပါလတ်ကတ်တေ။ အချစ်မပါရေ အိမ်ထောင်ရေး မတည်မြဲဆိုစော် မှန်ချင်လဲမှန်နိုင်ရေ။ ယကေ့လေ အိမ်ထောင်တည်မြဲဖို့တွက် နားလည်မှုအဓိကလို့ထင်ရေ။ အိမ်ထောင်ရေးတစ်ခုတည်းမဟုတ် အရာအားလုံးစော် နားလည်မှုရှိကေ အဆင်ပြေနိုင်ရေ။

အချစ်ဆိုစော် စွန့်လွတ်ခြင်း ပိုင်ဆိုင်ခြင်း ၀မ်းနည်းခြင်း ပူဆွေးခြင်း လောင်ကျွမ်းခြင်း ပျော်ရွင်ခြင်း အနစ်နာခံခြင်း နားလည်မှု အင်း ရွီးဖို့ဆိုကေ အများကြီးရသိရေ။ စာလုံးရာတစ်လုံးတည်း သတ်သတ်မှတ်မှတ် အဓိပါယ်ဖွင့်ဆိုလို့မရရေ အထဲမှာ ဒေလူတိရူးသွပ်ကတ်တေ အချစ်ကလဲ အပါအ၀င်ရာမနားယေ။ အချစ်ဆိုစော် (-)ကွက်လပ်ပါ လို့ပြောရေ အစ်ကိုတစ်ယောက်စကားကို ကကောင်းသဘောကျမိရေ။ ဟုတ်တေ ကိုယ်ဇာပိုင်ခံစားနိန်ရလဲ ခံစားနိန်ရရေ အပေါ်မှာ ယင်းကွက်လပ်ချေကို ဖြည့်ပနာ လူတိ ပြောတတ်ကတ်တေ။ ကြေကွဲနိန်ရေ အချိန်မှာ အချစ်ကကြေကွဲခြင်း။ ပျော်ရွင်နိန်ရေ အချိန်မှာ အချစ်ကပျော်ရွင်ခြင်း။ ယင်းနဲ့လို့ မိုနာလီဇာအပြုံးကို အဓိပါယ်အတိအကျ သတ်မှတ်လို့မရရေပိုင် ဒေအချစ်ကို တစ်ယောက်လဲ တိကျရေစကားလုံးနဲ့ စာမဖွဲ့နိုင်ပါ။

ယင်းနဲ့လို့ ကြိုက်တေပိုင် ပုံဖေါ်ပါ ခံစားရရေပိုင် ကွက်လပ်ဖြည့်ကတ်ပါ.... :P

၁၁.၁၁.၂၀၁၁ (သောကြာနိန့်)

  The most beautiful day, the most beautiful time, the most beautiful world. :) 11-11-11(10:00AM)


-ရင်ထဲက ဗြုန်းခနဲထွက်ပေါ်လာရေ ခံစားချက်တစ်ခုကြောင့် ဘ၀နှစ်ခုပိုပနာ နီးစပ်လားရေ နိန့်တနိန့်စွာ   ၁၁.၁၁.၁၁ ဖြစ်နခီရေ...

-မထင်မှတ်ဘဲနဲ့ ငါ့ဘ၀ထဲကို ရောက်မှန်းမသိရာက်လာစွာ ရှီ့ဘ၀ရစက်ကြောင့်လား...

-ဇာပြသာနာပင်လာလာ လက်နှစ်ဘက်ကို နနောင်းတွဲပနာရင်ဆိုင်ဖို့ သတ္တိတိထွက်ပေါ်လာစွာ အချစ်ရဲ့စွမ်းအားကြောင့်ရာထင်ရေ...

-ငါ့ဘ၀တစ်ခုလုံးကို တာဝန်ယူဖို့ ယုံကြည်မှုအပြည့်ရှိရေလို့ နင်ပြောခရေနိန့်က နင်စွာ ငါ့ဘ၀ HERO မလားယေလို့ ရင်ထဲမှာ ပီတိတိနဲ့ ဆို့နစ်နိန်ခရေ...

-ငါ့ရို့တိရှီ့မှာ မမြင်ရရေကံကြမ္မာက စောင့်ကြိုနိန်ကေလေ့သော ငါရင်ထဲက စကားလုံးတိက နင့်တွက် အင်အားဖြစ်ပါစီလို့မျှော်လင့်မိယင့်  ...

ငါရို့အတူတူ ပြုံးကတ်ဖို့
ငါရို့အတူတူ ရယ်ကတ်ဖို့
ငါရို့အတူတူ ၀မ်းသာကတ်ဖို့
ငါရို့အတူတူ ၀မ်းနည်ကတ်ဖို့
ငါရို့အတူတူ ငိုကတ်ဖို့
ငါရို့အတူတူ နာကြင်ကတ်ဖို့
ငါ့ရို့အတူတူ ဘ၀ကို ချိုတစ်ခါ ခါးတစ်လှည့်နဲ့ မြည်းစမ်းကြည့်ကတ်မေ.... 

တစ်စုံတစ်ယောက်တွက်.....

တန်းဆောင်မုန်းလပြည့်

အာကာထက်မှာ လမင်းကြီးထိန်ထိန်သာနိန်ဗျာလ်ထော...

အိန်ဒြေတိနဲ့လှနိန်ရေ မမချေတစ်ယောက်ပိုင် လမင်းကြီးကို ဇာလောက်ပင်တိမ်တိ ဖုံးထားဖုံးထား သူ့အလင်းရောင်က ကမ္ဘာမြီကို လွမ်းမိုးနိန်အောင် အရောင်တောက်ပနလီယင့်။ ခိုးစားလပြည့်လို့ခေါ်ရေ (တန်ဆောင်မုန်းလပြည့်) ဒေနိန့် ဒေအချိန်ခါ ဇာတိမြီမှာ ဇာလောက်ပျော်ဖို့ကောင်းမယ်မသိ့။ အချေခါ တစ်အိမ်ဝင် တစ်အိမ်ထွက် အုန်းသီးတောင်းခရေ မရကေ့ ခိုးကတ်စွာတိကို စိုင်းစားလိုက်ကေ ညစာကပိုင် ခံစားရတုန်းသိ့။

လပြည့်တကာ လပြည့်ထဲမှာ တန်ဆောင်းမုန်းလပြည့်က အလင်းရောင်အတောက်ပဆုံး အကြီးမားဆုံး။ ဗုဒ်ဓဘာသာ ထွန်းကားရေ အကျွန့်ရို့အဖရခိုင်ပြည်မှာ အင်ကျီအဖြူ ဒယော ထဘီ ယောဂီရောင်နဲ့ဇာလောက်ကြည်ညိုစရာ ကောင်းရေဆိုစွာကို စိုင်းစားလိုက်ကေတောင် ကြက်သီးထစီရေ။ အိမ်ပြန်ချင်ရေ အိမ်ပြန်ချင်ရေလို့ အော်စွာလဲ အကြိမ်ပေါင်းမနည်းဗျာလ်။ ဒေပိုင်အချိန်တိဆိုကေ အိမ်ပြန်ချင်ရေ ရောဂါပိုးက ပိုလို့ထလာရေ။

ဘုန်းကြီးကျောင်းကို အမြဲတမ်းခေါ်လားရေ ဘောင်ဘာင်နဲ့ကြီးကြီးကိုလဲ အောက်မိန့်ရေ။ မုန့်ဖိုးဖေ့ချာပီးရေ ဖိုးဖိုး မေမေ ထွီထွီ မာမာကိုလဲ အောက်မိန့်ရေ။ အင်ကျီအသစ်ဝယ်ပီးရေ မကြီးကိုလဲ အောက်မိန့်ရေ။ ထမင်းတူတူချက်စားခရေ သူငယ်ချင်းတိကိုလဲ အောက်မိန့်ရေ။ ဖယောင်းတိုင် ဖေချာ့နဲ့ရှီခိုးခရေ အိမ်ဘေးနားက အဘိုးရှင် အဘောင်ရှင်တိကိုလဲ အောက်မိန့်ရေ။ မုန့်ဖိုးဖေချာလိုက်တောင်းခရေ ဆရာ ဆရာမတိကိုလဲ အောက်မိန့်ရေ။ မေယူမြစ်နံဘေးက မီးပုံးတိနဲ့ကျက်သရေရှိနိန်ရေ စေတီတောင်ကိုလဲ အောက်မိန့်ရေ။ လူကြီးလူငယ်တိနဲ့ စည်ကားနိန်ရေ ဇာတိမြီကိုလဲ အောက်မိန့်ရေ။

တန်ဆောင်မုန်းလပြည့်ညမှာ ဇော်ဂျီဖော်စပ်တေ မိုင်းဇလီကိုစားကေ အသက်ရှည်ရေလတ်။ဇော်ဂျီဖော်စွာကိုမစားရလို့ မြန်မာဆိုင်က နန်းဆီနဲ့သုပ်ထားရေ မိုင်းဇလီကိုစားပစ်ခီယင့်။ Market ကအုန်းသီးဝယ်ပနာ သူများအိမ်ကခိုးထားရေ အုန်းသီးရည်မှတ်ပနာ သောက်ပစ်ခီယင့်။ လရောင်ကို အသေအချာမခံစားရဘဲ မြို့ပြမီးအလင်းရာင်နဲ့ ရှိနိန်ရေ တန်းဆောင်မုန်းလပြည့်ည နောက်ထပ်ဇာနည ကြုံရဖို့သိ့လဲ။
ပြီးလားပြန်ယာ တန်းဆောင်းမုန်း လပြည့်ညတစ်ည။ အခန်းထဲကနိန် အကျွန့်နှလုံးသား ရှိနိန်ရေနိန်ရာကို မျှော်ပနာလွမ်းမိပါယင့်...

မတောင့်တပါဗျာလ်...

မအောက်မိန့်ပါဗျာလ်...

(10/11/2011 Thursday )

တစ်ရာသီ

 

မိုးရာသီကိုရူးရူးမှုးမှုး ဖြစ်နိန်ရေငါ
ကံ့ကော်ပန်းကြိုက်လို့ နင့်ပါးစပ်မှာ အရူးလတ်
ကဗျာမဆန် စာမဆန်
နင်ပီးခရေ မျောက်ရုပ်
ငါ့အိပ်ရာဘေးမှာ ရှိနလီယင့်

ဘ၀ပါ နှလုံးသားပါ
တတည့်ကျအောင်
နင်သုံးခရေ လက်နက်က
ကကောင်းပြင်းထန်ခရေ

တိုက်ဆိုင်လိှု့ရှိခကေ
ကံ့ကော်ပွင့်ရေ အချိန်မှာ မိုးရွားခကေ
ငါ့ကို နင်အတွက်ပေါ်လီဖို့လား
နင့်အတွီးတိရှိနိန်ရေ မွီင်္းရပ်မြီမှာ
ငါ့စိတ်တိလဲ ရှိလီရေ

ဒေမိုးတိလဲ ငါ့ကိုနှိပ်စက်လွန်းရေ
ဖြစ်နိုင်ကေ ငါ့အလွမ်းတိ အချစ်တိကို
Discount ချပြီးရောင်းပလိုက်ချင်ရေ
နင့်အတွက် အသုံးမ၀င်ပါ
အသုံးမ၀င်ရေ ဒေချင့်တိကို
ငါဇာလုပ်သင့်လေ

တစ်သက်လုံး မ၀ီးပါလို့
အတွီးတိနဲ့ ပျော်နိန်ခရေငါ
အိပ်မက်တိပိုင် လွင့်စိုင်လခဗျာလ်

နင့်နဲ့ငါ့ကြား တစ်ရာသီ
ဒေတစ်ရာသီ တစ်ရာသီတည်းရာ
နင့်မျက်ဝန်းကို ငါပိုင်ဆိုင်ခရေအချိန်....

ပျော်ရွင်မှုတိနဲ့ အချစ်အဓိပ္ပါယ်

နောက်ဘ၀တိတွက်ပါ ဇရန်တင်ပြီး နင့်နဲ့ချစ်လားခွင့်ပြုနန်း

၁ - သူ့အလှကြောင့် မဟုတ်ဘဲ အချစ်တိကြောင့် သူလှနိန်စွာကို အချစ်လို့ခေါ်လား။

၂ - အန္ဒာရာယ်တွီ့ရေ အချိန်ခါ ကိုယ့်ရှီ့က ထထီးမမားရင်ဆိုင်ပီးနိုင်စွာကို အချစ်လို့ခေါ်လား။

၃ - အားငယ်နိန်ရေ အချိန်ခါ ကိုယ့်လက်ကို ကိုင်ပနာ နွီးထွီးမှုပီးနိုင်စွာကို အချစ်လို့ခေါ်လား။

၎ - ဇာပင်လုပ်လုပ် အပြစ်မမြင်ဘဲ ရှိနိန်စွာကို အချစ်လို့ခေါ်လား။ 
(ဒေချင့်ကို မျက်ကန်းအချစ်လို့ထင်ရေ)

၅ - သောကတိနဲ့ စိတ်ဖီးစီးမှုများနိန်ရေအချိန်ခါ အမိအဖတိပိုင် ရင်ခွင်ထဲမှာ အီးချမ်းရေ   ကြင်နာမှုတိနဲ့ နှစ်သိမ့်မှုပီးနိုင်စွာကို အချစ်လို့ခေါ်လား။

၆ - တွဲထားရေလက်ကို အလွယ်တကူ မဖြုတ်ချစွာကို အချစ်လို့ခေါ်လား။

၇ - ကိုယ့်မေတ္တာက သူ့တွက် ၀န်ထုပ်ဝန်ပိုး မဖြစ်စော်ကို အချစ်လို့ခေါ်လား။

၈ - ဇာစာအုပ်တိလဲ ဖတ်စရာမလိုဘဲ အချစ်အကြောင်းတိ သူ့တွက်ဆိုကေ အများကြီးပြောတတ်လာစွာကို   အချစ်လို့ခေါ်လား။

၉ - အိပ်ရာနိုးရေအချိန်ခါ သူ့အကြောင်းကို စိုင်းစားမိလိုက်လို့ ကမ္ဘာကြီးလှပနိန်စွာကို အချစ်လို့ခေါ်လား။

၁၀- အထီးကျန်တိုင်း သူ့ကိုအတွက်ပေါ်စွာကို အချစ်လို့ခေါ်လား။

၁၁- သူပို့ထားရေ Message ကို အကြိမ်ပေါင်းမနည်း ဖတ်မိစွာကို အချစ်လို့ခေါ်လား။

၁၂ -အရူးတိပိုင် တစ်ယောက်တည်း ပြုံးမိစွာကို အချစ်လို့ခေါ်လား။

၁၃- အရင်ထက်ပို Smart ကျချင်လာစွာကို အချစ်လို့ခေါ်လား။

၁၄- Expiry Date မရှိစွာကို အချစ်လို့ခေါ်လား။

၁၅- ကိုယ့်ဘ၀တစ်ခုလုံးကို ပုံပီးဝံ့စွာကို အချစ်လို့ခေါ်လား။


ပန်းပွင့်တိုင်းမှာ လိပ်ပြာတစ်ကောင် ရှိတတ်တေ။ 
ကိုယ်ကဇာလောက်ပင် အရုပ်ဆိုးနလီပါတ်စီ အထီးကျန်နလီပါတ်စီ ယင်းလိပ်ပြာချေ ကိုယ့်အနားကို အရောက်ရှာပြီးကေ လိုက်လာလိမ့်မယ်.....

လူ

ဇာကို "လူ" လို့ခေါ်လေ။ ဒေအသက်အရွယ် ရောက်နိန်ဗျာလ် "လူ" ဆိုရေ အဓိပါယ်ကို မသိသိ့။ လှန်ကြည့်ဖို့ အဘိဒန်လဲ ၀ယ်လို့မရ။ ဒေပင်လယ်ကို လက်ပစ်ကူးလီမှ ကကောင်းသိလားဖို့ထင်ရေ။ ရီကူးသင်ဖို့ ဆရာကောင်းကောင်းတစ်ယောက် ရှိရဖို့သိ။ မဟုတ်ဘဲနဲ့ ရီကူးဝတ်စုံ ၀ယ်ပနာ တစ်ခုကိုလဲ မကြည့်ဘဲနဲ့ မျှောနီရဖို့လား။
ဘ၀အကြောင်း စိုင်းစားကြည့်လိုက်ကေ အပျိုဖြန်းချေတိပိုင် ရင်ခုန်နှုန်းတိ မြန်လာရေ။ ပျစ်စုပန်မှာ ထိုင်နိန်ပနာ မမြင်ရသိရေ အနာဂါတ်တွက်လဲ စိတ်ပူရေ။ ပြီးလခရေ အတိတ်တွက်လဲ နောင်တတိကို ပိုင်ဆိုင်ထားသိယင့်။ ကိုယ့်စွာကိုယ်လဲ "မသိယာ မသိယာ" လို့ရာ ဇာနှစ်ခေါက် သက်ပြင်းချမိလေမသိ။

"ဘ၀အကြောင်း ကောင်းမစိုင်းစားကေ့, ဒေဇာတ်ခုံမှာ ကျရေနိန်ရာက တာဝန်မထမ်းဆောင်ကေ လိုချင်စွာကို ရအောင်ယူဖို့ အားထုတ်ရကတ်ဖို့"လို့ အရီးမတစ်ယောက် ဆုံးမခရေ။ လူတစ်ယောက်ဘ၀နဲ့ တစ်ယောက်ဘ၀မတူစွာကို အပြစ်ပြောလို့မရ။ ကုသိုလ်ကံလဲ တစိတ်တပိုင်းပါရေပိုင် ၀ီရိယလဲရာခိုင်နှုန်း အပြည့်နီးပါးလိုအပ်တေ။ ကြားဖူးရေ ဆောင်ပုဒ်ချေတစ်ခုကို လားအတွက်ပေါ်ခီယင့် ဆင်ပတုံးကိုစမ်းမိရေလူက ဒေချင့်ကမြွီပိုင်လို့ပြောဖို့။နောက်ကုန်းကိုစမ်းမိရေလူက ချောနိန်ရေလို့ပြောဖို့။ ဆင်တစ်ကောင်ကို မျက်မမြင်ရေ လူတိစမ်းပနာ ဝေဖန်ရေပိုင် ဘ၀ဆိုစွာလဲ ယပိုင်ယာ။ ကိုယ်ကိုင်မိရေအတိုင်း ခံစားရကတ်ဖို့စွာရာမနား။

ဒေနိန့် နိန်မကောင်းလို့ ခွင့်ယူလိုက်တေ ဆီးခန်းကိုမလားချင်ဘဲနဲ့ လားခီရရေ။ ဆီးခန်းနားက Food Court ကိုရောက်တေခါ ဆိုင်မှာလုပ်နိန်ရေ တရုတ်မနဲ့တူရေ မမတစ်ယောက် အကျွန်နဲ့ ဘေးကပါလာရေအဖော်ကို စိုက်ပနာကြည့်နိန်ရေ။ စိတ်ကလဲ ဒေမမကို မြင်ဖူးရေပိုင်တွီ့ရေ။ ဇာနားမှာ တွီ့ခလဲ စိုင်းစားရေ စိုင်းစားလို့မရ။ ဒေကုတလော အသက်အရွယ် ကြီးလာလို့ထင်ရေ ဦးနှောက် ဗြုန်းခနဲဆိုကေ လုံးဝစိုင်းစားလို့မရယာ။ ဆီးခန်းက ပြန်လာရေခါ အိမ်မှာချက်ထားစွာ တစ်ခုလဲမရှိလို့ ယင်းဆိုင်တန်းထဲက တစ်ဆိုင်မှာ ၀င်စားဖြစ်တေ။ ထမင်းမှာပြီးရေခါ အအီးသောက်ဖို့ ယင်းမမက အနားကိုလာပနာ ဇာသောက်ဖို့လဲ ဆိုပနာလာမိန်းရေ။ အအီးပီးပြီးရေခါ အနားက မခွါလီယာ။ ထမင်းစားနိန်စွာကို ထိုင်ပနာကြည့်နိန်ရေ။ထူးဆန်းရေ တစ်မျိုးလို့ အနားက ထွက်မလားလီမြင်ယင့် Customers တိတွက် ဒေချင့်က မကောင်းလို့ ဘေးကအဖော်ကို ပြောမိရေ။

ယေခါ ယင်းမမက ဗမာစကားနဲ့ မဟုတ်တစ်မျိုးမထင်ကေ့ ကိုယ့်မြန်မာလူမျိုးဖြစ်လို့ ကြည့်နိန်စွာလတ်။ ယင်းခါမှ ကောင်းကောင်းအားနာလားရေ။ အော်ဒေမမစွာ ဘုန်းကြီးကျောင်းမှာ မှတ်မှတ်ရရသိလိုက်တေတစ်ယောက်ရာမနားယေလို့ သတိရလာရေ။ ဒေအတိုင်းနိန်ကေတောင် ခါးကပေါ်ရေ နောက်ကုန်းဗလာကျင်းအင်ကျီ ပေါင်တစ်ပိုင်းလောက်ရာရှိရေ စကပ်နဲ့ လုံးဝမအပ်စပ်တေ အ၀တ်အစားကို ၀တ်ထားလို့ ဘုန်းကြီးကျောင်းမှာရှိသမျှ လူတိုင်း သူ့ကို သတိထားမိလားကတ်တေ။ နိုင်ငံခြားမှာနိန်ပြီးကေ အမြင်ကျဉ်းနိန်စွာတောင် မဟုတ်။ နေရာ ဒေသအလိုက် ၀တ်တတ်ဖို့လဲ လိုအပ်တေ။ အော် ဒေချင့်လဲ ပေါ်ပြူလာဖြစ်အောင်လုပ်တေ တနည်းရာမနားယေလို့ ယင်းခါတောင် အတွေးတစ်ချက် ၀င်လိုက်သိ့ရေ။
အစ်မရို့ ဇာလုပ်စွာလဲ စာရင်းကိုင် အင်ဂျင်နီယာတိလားလတ်။ သူမိန်းရေ မိန်းခွန်း စိတ်မကောင်းဖြစ်မိရေ။ အကျွန်ရို့ထက် ကြီးဖို့ပုံပေါက်တေ ယကေ့လေ့ လေးစားမှုနဲ့ထင်ရေ မမလို့ခေါ်ရေ။ ညိုးငယ်နိန်ရေ သူ့မျက်လုံးက ဒေလူတိရင်ကိုထိလားရေ။ အင်း သေချာစွာတစ်ခုက အလုပ်ဟူသမျှ ဂုဏ်ရှိရေဆိုစွာကို သူမိန့်ထားရေထင်ရေ။

ဒေကို လာရေ လူတိအများကြီးနဲ့ သူဆက်ဆံရရေ။ အချေ အကြီး ၀ါကျီး ၀ါကျီးမ ကအစ နှာဘူးတိနဲ့လဲ ဆက်ဆံရရေလို့ ကံမကောင်းလတ်။ လူတိနဲ့ ဆက်ဆံနည်း သူအတွီ့အကြုံက ပီးနိန်စွာကို သူကအရိပ်မကျ။ သူပြောရေ အဆင်မြင့်မြင့်နဲ့ အေးကွန်ရှိရေ ရုံးခန်းမှာ လုပ်ရစော်မှန်ရေ။ Pressure ဆိုစွာကို သူမတွီ့ဖူးသိလို့ထင်ရေ။ ဇာပင်ပြောပြော အလုပ်တိုင်းမှာ Pressure ရှိစွာရာ။ ကိုယ်လစာ ဇာလောက်ယူထားလေ ယူထားရေ အလျှောက် ပီးဆပ်ရကတ်စော်မနား။ တစ်ချို့ အလုပ်တိဆိုကေ လစာနဲ့ မတန်မရာ ခိုင်းပနာ တစ်ချို့အလုပ်တိက သက်သာရေ။ အားလုံးသူက ၀မ်းရေးဖှုံလှုံဖို့တွက် ဆင်ကိုယ်ကို စမ်းမိစမ်းရာ စမ်းနိန်ကတ်တေ။ စိတ်မညစ်ကေ့ ကိုယ့်ထက်ဆိုးရေ လူတိ လောကမှာ အများကြီးလို့ ဖြစ်နိုင်ကေ အလုပ်ပြောင်းဖို့ ကြိုးစားလို့ နှုတ်ဆက်ခရေ။ ယင်းမမလဲ ကျားယို ကျားယို(အားတင်းထား အားတင်းထား)လို့ ပြောပနာ အနားကထွက်လခရေ။ အင်း သူပြောစွာလဲမှန်ရေ။ အနာဂါတ်အတွက် အကျွန်လဲ ကျားယိုရဖို့သိမနားယေ။

မီးပွိုင့်နီ နိန်စွာကို မစောင့်နိုင်လို့ SHIT လို့တစ်ယောက်တည်း ပြောနိန်ရေ လူတစ်ယောက်ကိုလဲ တွီ့ခရေ။ ဓါတ်လှေကားက အထွက်ကို မစောင့်နိုင်ဘဲ ၀င်လားခရေ ၀ါဂျီးတစ်ယောက်ကို စည်းကမ်းမရှိလို့ ပြောနိန်ရေ လူတစ်ယောက်ကိုလဲ တွီ့ခရေ။ Mall ထဲမှာ အရှီ့ကကိုယ် Queue နိန်ယင့်သားနဲ့ ကိုယ်ရှီ့က ဖြတ်လုခရေ လူတစ်ယောက်ကိုလဲ တွီ့ခရေ။ အော်လူတိလူတိ ဒေလောက်နိန်လာကတ်ယာ သီဖို့လဲ စက်ကန့်နဲ့ အမျှနီးကတ်လာရေ ယင်းချင့်တောင် မစောင့်နိုင်ကတ်။
မဟုတ်ဘဲနဲ့ မိန့်ကွန်ဆောင်နိန်ကတ်စွာရှိဖို့။ ယင်းအထဲမှာ အကျွန်လဲ ရှီ့ဆုံးက ပါလီဖို့။ လူအမျိုးမျိုး စိတ်အထွေထွေ။ ဇာချင့်ကို လူလို့ သတ်မှတ်ရဖို့လဲ မသိယာ။ အားလုံးသူက နှလုံးတုနဲ့ အသက်ရှင်နိန်ကတ်တေ စက်ရုပ်တိပိုင်ဗျာလ်.....

နားလည်ပီးပါ

ဇာပင်ဖြစ်ဖြစ် ငါ့ကိုနားလည်ပီးနန်း

အင်းငါလား စိတ်ပုပ်တေ
မဟုတ် အရာလူတိကိုပီးလိုက်ကေ
ငါ့မှာနည်းလီဖို့နန်းရာ
ယကေ့လေ့ ငါ့ကိုနားလည်ပီးနန်း

အင်းငါလား သူများအကျိုးမငှဲ့ဘဲ အတ္တကြီးရေ
မဟုတ် ငါ့ကိုယ်ငါချစ်စွာရာ
ယကေ့လေ့ ငါ့ကိုနားလည်ပီးနန်း

အင်းငါလား မလှု
မဟုတ် သူရို့တိက အလုပ်မလုပ်လို့ ဆင်းရဲစွာ
ဇာဖြစ်လို့လှုဖို့လဲ ငါ့ချွေးတိနဲ့ရှာထားရရေ ဖေ့ချာတိ
နမြောဖို့ကောင်းရေ
ယကေ့လေ့ ငါ့ကိုနားလည်ပီးနန်း

အင်းငါလား ဆရာခံစော်
မဟုတ် သူရို့ပြောစွာတိကိုဂျေးယာ နားမထောင်ချင်လို့
ယကေ့လေ့ ငါ့ကိုနားလည်ပီးနန်း

အင်းငါလား ၀ါရေ
မဟုတ် ငါ့ကိုအထင်သေးလားလတ်မေ ကြောက်လို့ပြောမိစွာရာ
ယကေ့လေ့ ငါ့ကိုနားလည်ပီးနန်း

အင်းငါလား အရိပ်အကဲ နားမလည်
မဟုတ် သူရို့တိလုပ်စွာကို မစောင့်ချင်လို့ရာ
ယကေ့လေ့ ငါ့ကိုနားလည်ပီးနန်း

အင်းငါလား ကိုယ်ချင်းစာတရားမရှိ
မဟုတ် ယင်းလူတိကို ခခယယ မပြောချင်လို့ရာ
ယကေ့လေ့ ငါ့ကိုနားလည်ပီးနန်း

အင်းငါလား
မကောင်းစွာတစ်ခုလဲမရှိ
အားလုံး လူများထက်ကောင်းရေ
ယကေ့လေ့ ငါ့ကိုနားလည်ပီးနန်း...

တနိန့်အရောက် လာလတ်မေ

ဝိုးတ၀ါးကြယ်ချေတိ မမှိတ်မသုန်နဲ့
သူ့ရို့တာဝန်ကို ကျီအောင်ဆောင်ရွက်နိန်ကတ်စွာကို
အလုပ်ကပြန်လာတိုင်း မြင်ရရေ
လစန္ဒာရာ သူရို့အမင်ဆိုကေ ပျော်ဖို့ကောင်းရေပင်
အမင့်ရင်ခွင်မှာ ခိုလှုံခွင့်ရရေ ဘ၀ ဇာနဲ့လဲ လှဲလို့မရ...

မြို့ပြဂုဏ်ဒြပ်တိအောက်မှာ စည်းစိမ်တိနဲ့
သူရို့တိတွက် သာယာနိန်ရေထော
စိတ်ဖီးစီးမှုတိ ဒဇိုင်းမျိုးစုံနဲ့
နိန်ရာတိုင်းက ထိုးနက်နိန်ကတ်တေ...

Man-made တိနဲ့တန်ဆာဆောင်ထားရေ နိန်ရာမှာ
အကျွန့်ရင်က ကန္တာရသက်သက်ပါ
မျှော်လင့်ခြင်းတိ တပုံတခေါင်းနဲ့
ဆာလောင်နိန်ရေ ကြင်နာမှုတိကို ကျောခိုင်းပနာ
အိမ်လွမ်းရေ မျက်ဝန်းတိကို ၀ှက်ကွယ်ထားမိရေ...

ရိုသေကိုင်းရှိုင်းမှုနဲ့ ဂါရ၀တရားတိ
အရောင်ပင် ရှာမတွီ့ကာ
ဟန်ဆောင်မှုတိအောက်က မျက်နှာဖုံးတပ်ထားရေ
ပကတိမျက်နှာတိကိုလဲ တွီ့ခရယင့်...

စုတ်ချက်ဆွဲမကောင်းလို့ ဖြစ်ပျက်နိန်ရေ
ပန်းချီးကားတစ်ချက်ပိုင်
ကြည့်ပျော်ရူပျော်တောင် မဖြစ်တေ
ဒေဘ၀ကို ရုန်းကန်ရင်း
နက်ဖြန်ထဲက တစ်ရက်မှာ
ရောက်အောင်ပြန်လာလတ်ပါမယ်........

ရုပ်ကြွင်း

အသက်ရူရစွာ အဓိပါယ်မရှိ
အဂင့်လား ၀ါစွာလား ဆိုစွာကို အီးစက်နိန်ရေ
နင့်ကိုယ်က သက်သီပြနိန်ကေတောင်
ဒေကုထက်ထိ လက်ခံဖို့ ခက်နိန်သိရေ...

"ရီစီးကြောင်းကို ဖြတ်လို့ရခကေတောင်
ငါရို့ နှစ်ယောက် သံယောဇဉ်
လုံးဝဖြတ်လို့ ရလီဖို့မဟုတ်လို့"
နင်ပြောခရေ စကားတိကို
ပြန်ပနာ ကြားနိန်မိရေ...

သီခြင်းတရားက အရာရာထက်
ပြင်းထန်ရေဆိုစွာကို နင်မိန့်လားရေမနား
ဒေပိုင်အဆုံးသတ်ရဖို့လို့
ငါရို့တိ အိပ်မက်တောင် မမက်ခကတ်...

အချစ်ရှိရာမှာ အသက်ရှိရေဆိုကေ
ဇာမှာလေ ငါ့အသက်
ငါ့နားက နင်ထွက်လားစွာ ခြောက်နှစ်ရှိလားဗျာလ်
အောက်မိန့် တမ်းတစိတ်တိကို
ဇာအရာက နှစ်သိမ့်နိုင်ဖို့လဲ...

နင့်ကို ပြန်လာရခက်တေ
လမ်းကိုမှ ဇာတွက်ခေါ်လားခကတ်လေ
ငါ့ကို တစ်ယောက်တည်း
ဇာဖြစ်လို့ ထားပခလေ
နင့်ကို တွီ့ချင်စိတ်ကြောင့် ငါ့ရင်တိကွဲနိန်ပါဗျာလ်...

နိန်သားတကျဖြစ်ဖို့
ဇာချင့်တိ ငါပီးဆပ်ရဖို့သိလဲ
အသက်မရှိရေ ရုပ်ကြွှင်းမှာ
ငါ့တွက် အချစ်ရှိနိန်ကေ...

ချစ်တေမင်း.....

ရခိုင့်ဂုဏ်ရောင်

အကျွန် ရခိုင်ပါ.....

ပန်းတိုင် လိုက်လီပြီးလီလား
ကြိုးစားလာစွာ နှစ်ပေါင်းလဲ ကြာနိန်ဗျာလ်
လလွတ်လလပ်ပျံသန်းဖို့
ဆုံးရှုံးလားရေ အသက်သွီးပေါင်း ရီတွက်လို့လဲမနိုင်..

စည်းလုံးကတ်မယ် ညီညွတ်ကတ်မေ
အဖရခိုင်မြီ ငါ့ရို့လက်မှာ ရှင်သန်ဖို့တွက်
ကိုယ့်အတ္တကိုယ် တန်ဖိုးထားပနာ
ကိုယ်ကျိုးစွန့်လို့ မလုပ်နိုင်ကတ်
လုပ်တေလူကိုပင် စော်ကားချင်ရေ လူကရှိသိ့ရေ...

ကိုယ့်အချင်းချင်း သွီးကွဲနိန်ကေ
ဇာလူမျိုးက လာအထင်ကြီးဖို့လဲ
ဇာပင်လုပ်လုပ် ရခိုင်ဆိုရေ
ဂုဏ်ရောင် သင်းနလီအောင်
ရခိုင်သားတိမှာ တာဝန်အပြည့်ပါ...

ကိုယ့်ဖရား ကိုယ့်ဘုရင် ကိုယ့်မြီ
ကိုယ်သယံဇာတတိနဲ့ ရပ်တည်နီလာစော်
လူမျိုးရေး ဘာသာရေး
တတ်နိုင်ရေဘက် ငါလုပ်မယ်
ရခိုင့်သမိုင်း ရခိုင့်အကြောင်း
မသိကေ့လေ့ အမျိုးကိုချစ်တေသွီး
ငါ့မှာရှိရေ.....

သမိုင်းကို လိမ်လို့မရပါ.......

ရခိုင်ဘ၀ ရခိုင်အလှ သဘာဝရူခင်းတိ

ငါ့ရို့ လခြမ်းမြီမှာ
အစာရီစာ ပေါကြွယ်ဝရေ
စိတ်ထားကောင်းရေ ရခိုင်လူမျိုးတိ
သာယာလှပရေ သဘာဝရူခင်းတိနဲ့
ဘုရားရှင်အရိပ်အောက်မှာ အီးချမ်းနိန်ယင့်.....


ပိုင်ရှင်ကို ခွင့်မတောင်းဘဲနဲ့ အွင်လိုင်းထက်က Download လုပ်ထားရေ ဓါတ်ပုံတိလဲပါပါရေ။ ခွင့်လွှတ်ပါလို့ ပြောချင်ပါရေ။

ရခိုင်ဓါတ်ပုံတိ စုစီးမှု (၃)

 

မိုးရီတစ်စက်ကနိန် သမုဒ္ဒရာဖြစ်လားရေပိုင် အမှတ်တရ ဓါတ်ပုံချေကပင်စလို့ ငါရို့တိသမိုင်းကို ဖန်တီးလားကတ်မေ....

ပိုင်ရှင်ကို ခွင့်မတောင်းဘဲနဲ့ အွင်လိုင်းထက်က Download လုပ်ထားရေ ဓါတ်ပုံတိလဲပါပါရေ။ ခွင့်လွှတ်ပါလို့ ပြောချင်ပါရေ။

ဒီဇင်ဘာ သုံးဆယ့်တစ်

ရခိုင်လူမျိုးတိတွက် အသက်နှင့်အမျှ အရေးကြီးသော နိန့်တနိန့်

 

ပိုင်ရှင်ကို ခွင့်မတောင်းဘဲနဲ့ အွင်လိုင်းထက်က Download လုပ်ထားရေ ဓါတ်ပုံတိလဲပါပါရေ။ ခွင့်လွှတ်ပါလို့ ပြောချင်ပါရေ။

ရခိုင်ဓါတ်ပုံတိ စုစီးမှု (၂)

"သဇင်ပန်းခိုင် တမြိုင်မြိုင် ရခိုင်ဖုရားပေါင်း"
ဒေစာသားချေက ရခိုင်ပြည်နယ်မှာ ဗုဒ္စသာသနာ ဇာလောက်ထွန်းကားရေဆိုစော်ကို ဖော်ပြနိန်ပါရေ။



ပိုင်ရှင်ကို ခွင့်မတောင်းဘဲနဲ့ အွင်လိုင်းထက်က Download လုပ်ထားရေ ဓါတ်ပုံတိလဲပါပါရေ။ ခွင့်လွှတ်ပါလို့ ပြောချင်ပါရေ။