အိုလောက

သူ့ရို့ခံစားရရေ ဝေဒနာကို ကမ္ဘာကသိအောင် ပြခွင့်မရဘဲ လူမသိ ရှင်မသိဘဲနဲ့ သီလားရေလူတိ ဇာလောက်များနိန်ယာလေ။

ဇာခါလေ ဇာခါလေ ဇာခါမှလူတိ အီးချမ်းကတ်ဖို့လဲ။ ၂၀၁၂မှာ အဂင့်ကမ္ဘာပျက်ဖို့လားဆိုရေ သံသယတိလဲ ၀င်ပါလတ်ဗျာလ်။ ထိုနေရာမှာမီးလောင် ဒေနေရာမှာရီကြီး မကောင်းရေသတင်းတိရာနိန့်စိုင်ကြားနိန်ရရေ။ ဆူနာမီ နာဂစ် ဂီရိ ဇာသူတိပီးခကတ်တေ နာမည်လဲမသိ။ နာမည်ကတော့လှနိန်ပြီးကေ လူများတိ ဘ၀ကိုရက်ရက်စက်စက် ဖျက်ဆီးပခရေ။ နာက်ထပ်မိဖမဲ့ကတ်ရပြန်ဗျာလ်။ နောက်ထပ် သားသမီးတိ ဆုံးရှုံးရကတ်ပြန်ဗျာလ်။ သားကောင်းရတနာ သမီးကောင်းရတနာတိ မတိုးလာဘဲ မိဖမဲ့အချေတိ သားပျောက်လို့ ပူဆွေးနိန်ရေ မိဖတိကို မွီးထုတ်ပီးနိန်လားလို့ မိန်းချင်ရေ အိုလောက။

ပြာလဲ့နိန်ရေ အာကာအောက်မှာ ရီကြိုင်ကြိုင်နဲ့ ပင်လယ်ပြာ လှချင်တိုင်းလှနိန်ခရေ။ စိတ်ဖိစီးမှုရတိုင်း အပန်းဖြေဖို့ လားကတ်တေ ကမ်းခြေ မုန်းတိုင်းဝင်ကေ လှနိုင်သိလား။ အသက်ပေါင်းဇာလောက်ကို မျိုချပလိုက်ယာလေ။ မမြဲရေ လောကဓံလို့ပြောရဖို့ဗျာလ်။ ဒေကုတစ်မျိုး တနားကေတစ်မျိုးဖြစ်နိန်ရေ ကိုယ့်စိတ်ကိုယ်တောင် နားမလည်နိုင်စွာမှာ ဖောက်ပြန်နိန်ရေ ရာသီဥတုကြောင့်ဖြစ်လာရေ အကျိုးဆက်တိအောက်မှာ ငါ့ရို့တိ သားကောင်ဖြစ်လခကတ်ဗျာလ်။ ဇာကိုအပြစ်ပုံချရခီဖို့လဲ။ 

ဒေကမ္ဘကြီး ဇာခါမှ တည်ငြိမ်လားဖို့လဲ။ နောက်ထပ် ဇာဝေဒနာတိ ပီးဖို့သိလဲ။ အသင်လဲမကယ်နိုင်ဗျာလ်လား အိုလောက။

သောကအပြည့်နဲ့မျက်လုံးတိကို လျစ်လျုရှုနိန်ကတ်ကေ အကျွန်ရို့တိကိုလူလို့ ခေါ်ထိုက်သိလား။ ခိုကိုးရာမဲ့နိန်ရေ လူတိကို နွီးထွီးမှုမပီးဘဲ ကိုယ့်အတ္တကိုယ်ရာ ကြည့်နိန်ရေအထဲမှာ ငါ့တစ်ယောက်အပါအ၀င်လို့ သိလိုက်မိရေအချိန်မှာ ငါလဲ အသိညဏ်မဲ့ရေ တိရစ္ဆာန်တစ်ကောင်နဲ့ ထူးမခြားနားဖြစ်လခဗျာလ်။ ဖလောရင့်နိုင်တင်ဂေး(မီးအိမ်ရှင်မ)ပိုင် သူ့ဘ၀တစ်ခုလုံးကို တစ်ခြားလူသားတိပါးမှာ မပီးဆပ်နိုင်ခကေတောင် အကျွန်ရို့တိ မေတ္တာကိုပီးနိုင်သိရေ။ သူတစ်ပါးကိုစိတ်ချမ်းသာအောင်လုပ်ပြီးကေ ကိုယ့်စိတ်ချမ်းသာမှုကို ရယူနိုင်ရေလို့ အရှင်ဘုရားတစ်ပါး ကဟောခသိရေ။ လောကဓံကပီးရေ ဒုခကိုခံစားနိန်ကတ်ရရေလူတိတွက် အကျွန်ရို့တိ တတ်နိုင်သလောက် ဇာလုပ်ပီးနိုင်ဖို့လဲဆိုပနာ စကေ့ချေလောက် စိုင်းစားပီးကတ်မယ်။ 

နောက်ဘ၀တောင်မဟုတ် ဒေဘ၀မှာခံစားနိန်ကတ်ရရေ အရှင်ငရဲကလွတ်အောင် ဇာအရာတိက တားဆီးနိုင်ဖို့လဲ အိုလောက။