မုဆိုးမ ဘ၀

ကြယ်မမြင် လမမြင်ရေ အချိန်တိုင်း ဒေသမီး ဒေသားတိ မျက်နှာနဲ့ အသက်ရှင်သန်ခရေ။ လမ်းပျောက်လခရေ အချိန်တိုင်း ဒေရင်သွီးတိ အနာဂါတ်လမ်းကို မြင်ပနာ ၀ိုးတ၀ါးနဲ့ လျှေက်ခရေ။

မေမေ "သားဆယ်တန်းကို ဂုဏ်ထူးတစ်ဘာသာနဲ့ အောင်ရေ" ညစာက ပြောလာရေ သားချေစကား နားထဲက မထွက်လီဗျာလ်။ သားဆရာမလဲပြောခရေ ဒေကောင်ချေကို ပျိုးပီးကေ ဖြစ်ဖို့လတ်။ ပျိုးချင်စွာတော့ ပြောဖို့မလိုပါ ဆရာမ။ ကိုယ့်သားသမီးတိ အရာလူတိနဲ့တန်းတူ ထားချင်တောင်မက သူရို့ထက်သာရေ နိန်ရာမှာထားပနာ အကောင်းဆုံးအရာတိကိုရာ ပီးချင်စော်က မိဘတိုင်းမှာရှိရေ စေတနာတိရာ။ ဇာပင်ဖြစ်ဖြစ် သမီးကြီးပါးမှာ တာဝန်မကျီခစွာတိတွက်ပါ ငါတော့ သားချေတွက် တစ်ခုခုတော့ လုပ်ပီးရဖို့။

သမီးအကြီးဖြစ်လို့လားမသိ ယောက်ကျားတစ်ယောက်ပိုင် အားကိုးရရေ။ အိမ်ပြင်မှာ ဇာပြသာနာပင်ဖြစ်ဖြစ် ရဲရဲဝံ၀ံ ရင်ဆိုင်ပနာ အိမ်ကိုရောက်မှ ငိုတတ်တေ ဒေသမီးကိုလဲ တစ်ခါတစ်ခါ သနားမိရေ။ သူတတ်ချင်ရေ တက္ကသိုလ်ကို ပစပ်ကတောင်ထုတ်မပြော အ၀ီးသင်တတ်ပနာ ငါ့နားမှာ အမြဲတမ်းရှိနိန်ရေ။ အင်း ကမ်းမမြင်ရေ ပင်လယ်ထဲမှာ လက်ပစ်ကူးနိန်ရေ ငါ့ပါးမှာ သမီးနဲ့သားစွာ ငါ့တွက် မယ်ခလာရာမနားယေ။ မင်းရို့တိကြောင့်လဲ ဆက်ပနာ အသက်ရှင်သန်နိန်ရစွာ အဓိပါယ်ရှိလို့နိန်ရေ။

သူငယ်ချင်းတိနဲ့တန်းတူ မုန့်ဖို့ဖေချာမပီးနိုင်, အ၀တ်အစား ပြောင်ပြောင်ထင်ထင် မဆင်ပီးနိုင်, ကျုရှင်အကောင်းမှာ မထားနိုင်ခလို့ ဒေအမိရင်မှာ သက်ပြင်းတတိုးချေစီ ချမိရေ။ တက္ကသိုလ်တတ်နိန်ရေ သားအတွက် သမီးကြီးက ပြောနိန်ဗျာလ်။ အရင်ခါ မေမေစွာသူ့ဘ၀လတ်,ဒေကုတော့ခါ မောင်ချေကို သူ့ဘ၀တစ်ခုလုံးကို ပီးရလီပါတ်စီ သူဖြစ်ချင်စွာ အားလုံးကို လုပ်ပီးဖို့လို့ ဘ၀ကိုရင်းပနာ စိန်ခေါ်နိန်ဗျာလ်။ ဒေချင့်တိကို သားချေ မပြောဘဲနဲ့ နားလည်ဖို့လို့ထင်ရေ။

အိမ်မှာယောက်ကျားသား မရှိလို့လား မဟုတ်ဘဲနဲ့ မချမ်းသာလို့လား တစ်ခါတစ်ခါ ပတ်ဝန်းကျင်ပါးမှာ အထင်သေးခံရတိုင်း သားချေအံကြိတ်သံကို မြင်ခရရေတနိန့် အမင်ငိုမိရေ။ တစ်ယောက်တည်း ရင်ဆိုင်လာရေဒေဘ၀မှာ ငါ့ရှိက မမားရပ်ပီးနိုင်ရေ သားတစ်ယောက်ရဲ့ ခွန်အား အမင့်ကိုကြက်သီးထစီရေ။ ဖေချာအဆင်မပြေလို့ အမင့်ပါးမှာ မပူဆာခဘဲနဲ့ လုပ်ချင်စော်ကို မပြော လုပ်သင့်စွာကိုရာ လုပ်ကတ်တေ ဒေသားနဲ့သမီးစော် အမင့်တွက် အင်အားတိရာမနားယေ။

စိတ်မကောင်းရေမျက်နှာနဲ့ သမီးကြီးပီးလာရေ စာကိုဖတ်ပြီးရေခါ အမင့်ရင်ထဲမကောင်းကာ။ သားရည်မှန်းချက်ကို ဒိုင်ယာရီမှာ အမင်မဖတ်လိုက်ရကေလေ့ ဒေ၀ဒနာကို ခံစားလီရဖို့မဟုတ်။ နိုင်ငံခြားကိုထွက်ပနာ အလုပ်လုပ်ဖို့လို့ပြောရလောက်အောင် အသက်က နှစ်ဆယ်ရာရှိသိရေ။ ဘ၀ပန်းတိုင်ကို စွန့်ပနာ လိမ်မာရေ ဒေသားကို ဒေချင့်မှာတော့ ခေါင်းမာနလီဗျာလ်။ လူတိက ပြောကတ်တေ ကံကောင်းရေမနားယေ အငယ့်ချေကပင် အမိမုဆိုးမကို လုပ်ကျွေးနိန်ရေလို့။ အော်ငါ့သားသမီးတိလဲ ပညာသင်ဖို့ အရွယ်မှာ အလုပ်လုပ်နိန်ရကတ်ဗျလ်လို့ အားနာစိတ်တိက အမင့်ပီတိထက် အားကြီးနိန်ရေ။

" မိုးသက်လီပြင်ပြီးကေ လီပြေလာစမြဲပါအမင်
  အမင်ဒုက္ခကို ခါးစည်းခံခသမျှ ဒေတစ်ခါနားပလိုက်ပါဖိ

  သားသမီး မျက်နှာမငယ်ရအောင်
  တစ်ယောက်တည်းကေ့လေ့ ခြင်္သေ့ဆိုရေစိတ်နဲ့ နိန်ပီးခရေ
  စုံလင်ရေမိဘပါးမှာထက် အမင်တစ်ယောက်တည်းပါးမှာ
  လူဖြစ်ရစော်ကို ပိုတန်ဖိုးထားပါရေ

  အမင့်ကိုမွီးပီးခေ၇ အဘောင်ရှင်ကိုလဲ ကျေးဇူးတင်ရေ
  အမင်အပြုံးတစ်ချက် သားသမီးတိ ဘ၀လမ်းကို လင်းလက်စီရေ

  ဒေမွီးနိန်ကပင်စလို့ အမင်စိတ်ချမ်းသာ ကိုယ်ချမ်းသာမှုတိနဲ့
  ကျန်ရှိနိန်ရေ ဘ၀ကို ဖြတ်သန်းရပါစီ
  ရင်သွီးတိတွက် ဆက်ပနာ အသက်ရှင်သန်ပီးပါအမင်........"

49 နှစ်လုံးလုံး အမင်အသက်ရှင်သန်ရကျိုးနပ်ပါဗျာလ်။