မကောင်းရေ အကျင်.ဆိုးတိ။ ဇာလောက်ပင်မလုပ်မလုပ် လို.ကိုယ်.စွာကိုယ်ပြောပြော ဆက်လုပ်ကောင်းတုန်း။ မိုက်ကောင်းတုန်း။ဒေအကျင်.တိ အချေကပင်ပါလာစွာလား ဆိုကေ။ မဟုတ် ရန်ကုန်မှာ နိန်ရေလောက်ကပင် ဇာပိုင်တတ်လားရေ အကျင်.တိလဲမသိ။
လူမအိပ်တေ အချိန်မှာ တစ်ယောက်တည်းရှိနိန်ရစွာကို ကောင်းသဘောကျပါလတ်တေ။ နိန်ဖူးကတ်လားမသိ။ ညဉ်.အချိန်မှာ လူတစ်ယောက်လဲမရှိ ဒေပတ်ဝန်းကျင်မှာ ကိုယ်တစ်ယောက်တည်းဆိုရေ အသိစိတ်က တစ်ခုနဲ.တောင်မလှဲနိုင်။ ကောင်းကောင်း သဘောကျရေ။ တိတ်ဆိတ်ပြီးကေ စိတ်လဲငြိမ်ရေပိုင်တွီ.ရေ။ တစ်ယောက်နဲ.လဲ စကားပြောစရာမလို။ အီးချမ်းရေ။ တစ်ယောက်မျက်နှာကိုလဲ ငှဲ.နိန်စရာမလို။ တစ်ခါတစ်ခါဆိုကေ ငှက်ချေတိ အော်သံတောင်ကြားရရေ။ ယင်းအချိန်မှာဆိုကေ ကိုယ်ဇာလုပ်ချင်လေ ကိုယ်ဇာဖြစ်ချင်လေ ဆိုစွာကို စဉ်းစားမိရေ။
အမှောင်မှာ တေးခြင်းနားထောင်ရစွာကို ရူးရူးမှုးမှုး စွဲလမ်းလာရေ။ ယင်းအချိန်မှာမှ တေးခြင်း အဓိပါယ်ကို ပိုနားလည်ရေပိုင် ဂီတ ဆိုစွာ လိုအပ်တေမလားယေလို. နားလည်ပါလတ်တေ။ တေးခြင်းတစ်ပုဒ် စာသားကိုကြိုက်လားတိုင်း သူငယ်ချင်းတိပါးက မရရအောင် ယင်းတေးခြင်းရဖို. နားပူနာဆာတောင်းတုန်း။ တစ်ခါတစ်ခါဆိုကေ ရင်ထဲမှာဇာဖြစ်နိန်လေ မုန်းတိုင်းပိုင် ပြင်းပြင်းထန်ထန် ခံစားနိန်ရလာ။ ဝေဒနာတိက ဆိုးဆိုးရွားရွား နှိပ်စက်နိန်လာကိုယ်.ကို။ ရီချိုးခန်း ၀င်ပြီးကေ တေးခြင်းတစ်ပုဒ် အော်ဆိုပလိုက်တေ။ တစ်ခါတစ်ခါ ငိုချင်လာရေဆိုကေ ရီချိုးခန်းက ရီပန်းအောက်မှာ ရီနဲ.တူတူ မျက်ရည်တိကို သွန်းချပလိုက်တေ။ ယင်းခါမှ ရင်ထဲကိုပေါ.လားရေ ပိုင်တွီ.ရေ။ မဟုတ်ကေ ရင်ထဲမှာ ဆို.နိန်ရေ။ တမွီ.မွီ.နဲ.ဖွဲမီးပိုင်ဗျာလ် လောင်ကျွမ်းနိန်ရေ။
စိတ်ညစ်တေ အကျင်.ကို မွီးထားစွာက ကောင်းဆိုးရေ။ ယင်းအကျင်.ကို ဇာလောက်ပင်ဖျောက်ဖို. ကြိုးစားကြိုးစား ဒေကုထက်ထိ ဖျောက်လို.မရသိ။ ဇာကြောင်. စိတ်ညစ်လေ ဆိုစွာကို ဖြေရှင်းဖို.စွာကို မစဉ်းစားဘဲ ကိုယ်.ကိုစိတ်ညစ်စီရေ ကိစ္စကိုရာ ထပ်တလဲတလဲ စိတ်ကရောက်နိန်ရေ။
စိတ်ဓါတ်ကျတတ်စွာကိုလဲ ပြင်လို.မရသိ။ လူတိကတော. ပြောကတ်တေ။ နန်းစံကိုမြင်ကေ ကိုယ်.စွာကို ယုံကြည်မှုရှိရေပိုင် မြင်ရလို. အားကျရေလတ်။ တပျင်းတောင်ရယ်ပလိုက်ချင်ရေ။ ဇာသူသိဖို.လဲ နန်းစံဆိုစွာ ဇာလောက်အားငယ်တတ်တေ ဇာလောက်ကြောက်တတ်တေ ဇာလောက်ကိုယ်.စွာကို စိတ်ပျက်တတ်တေ ဇာလောက်ယုံကြည်မှုနည်းလေ ဇာလောက်ပျင်းတတ်တေ ဇာလောက်ဆိုးလဲဆိုစွာကို။ တစ်ခါတစ်ခါလူတစ်ယောက်ကိုယ်.ကို စော်ကားစွာကို သိကေ.လေ ပြန်ပြောဖို. စကားတိရှာမတွီ.ဘဲ ငြိမ်ခံနိန်ရေ အကျင်.တိကိုလဲ မုန်းရေ။ သတ်သီလားချင်အောင် စိတ်ဓါတ်ကျတတ်စွာကိုလဲ မုန်းရေ။ စာအုပ်တိရာ မကယ်ကေ နန်းစံ အသက်ရှင်လို. ရှိဖို.မဟုတ်ဗျာလ်။ စာဖတ်မပီးကေ စာအုပ်တိရာ နန်စံဘ၀မှာ မရှိခကေ နန်းစံဘ၀ အဆုံးသတ်လားစွာကြာဗျာလ်။
ထမင်းစားပြီး ညဉ်.အိပ်ဖို.ခါမှ ရီချိုးရေဆိုစွာ ၀မ်းပူနာ ဖြစ်တေလို. မယ်မယ်က ဇာလောက်ပင်ပြောပြော ဒေကုထက်ထိ ချိုးကောင်းတုန်း။ ညဉ်.ခါ ခေါင်းလျှော်စွာ မကောင်း ဦးနှောက်မှာ ရောဂါဖြစ်စွာကို သိကေ.လေ လုပ်ကောင်းတုန်း။ ဇာလောက်ပင် ရင်တုန်တုန် တနိန်.ကို ကော်ဖီသုံးခွက်လောက်တော. အမြဲသောက်လို.ကောင်းတုန်း။ အလုပ်မလားရရေ နိန်.ရက်တိဆိုကေ အနည်းဆုံး လေးခွက်။ စာပင်ရွီးရွီး စာပင်ဖတ်ဖတ် ဘေးမှာကော်ဖီတစ်ခွက်နဲ. တေးခြင်းရာနားထောင်နိန်ရကေ ဘ၀မှာ ကောင်းကောင်းပြည်.စုံရေပိုင်တွီ.ရေ။
တစ်ခုခုကို လားဖို.လုပ်တိုင်း အချိန်နီးခါမှ လုပ်ကောင်းတုန်း။ ဇာလောက်ဆိုးလေ အင်တာဗျုးခေါကေတောင် ကိုယ်.ကို လေးနာရီချိန်းလိုက်ကေ အနည်းဆုံးနာရီဝက်လောက် နောက်ကျမှ ရောက်လားရေ။ တစ်ခါတစ်ခါဆိုကေ သူငယ်ချင်းတိကို အားနာမိရေ။ ကိုယ်နဲ.ချိန်းထားပြီးမှ သူရို.က ကိုယ်.ကို အမြဲတမ်းစောင်.ရစွာကို။ ယင်းအကျင်.ကိုလဲ ပြင်လို.မရသိ ဒေကုထက်ထိ။
တစ်လတစ်ခါ ငိုမိရေ ကိုယ်.အကျင်.တိကိုလဲ မုန်းရေ။ အိမ်ကိုသတိရလို.လားဆိုကေ မဟုတ်။ အိမ်ကိုပြန်ချင်လို.လဲမဟုတ်။ ကိုယ်.ဘ၀ကို စဉ်းစားမိ.ကေ ကိုယ်.အနားမှာ တစ်ယောက်လဲ မရှိရေပိုင်တွီ.ရေ။ ပျင်းလာရေ အထီးကျန်ရေပိုင်တွီ.လာရေ ဇာလောက်ပင်ကိုယ်.ကို အနားမှာထိုင်ပြီးကေ စကားလာပြောပြော။ လူတိမရှိကေ.လေ တစ်ယောက်တည်းနိန်ရေ အချိန်တိမှာ စိတ်ချမ်းသာမိရေ။ တစ်ခါတစ်ခါ နန်းစံ ကိုယ်.စိတ်ကို ပြန်ပနာသုံးသပ်မိရေ အချိန်ဆိုကေ "ငါ.စိတ်တိပုံမှန်ကော ဟုတ်လား။ ဇာလို.ဒေပိုင်ဖြစ်နိန်ရလေ မသိ အရူးတိပိုင်ဗျာလ် မဟုတ်ရူးနိန်ဗျာလ်လားမသိ" လို.။
လူတစ်ယောက်ကို လွယ်လွယ်ကူကူ ယုံတတ်တေ။ ဒေပိုင်စိတ်နဲ.ဆိုကေ လောကကြီးကို ၀င်တိုးလို.မရသိ.ဆိုစောကိုသိရေ။ မပြင်နိုင်စော်က ခက်တေ။ လူတစ်ယောက်ကိုရာ ခင်မိလားကေ ကိုယ်.ဘ၀ ကိုယ်ဇာဖြစ်နိန်လေ ဇာခံစားနိန်ရလေ အားလုံးကိုပြောမိရေ။ ယင်းနဲ.လို. အကိုကပြောရေ ကိုယ်.ဘ၀အကြောင်းကို တစ်ယောက်ကိုလဲမပြောမိစီကေ.တဲ.။ သူ.က ကိုယ်.ပေါ အမြဲတမ်းကောင်းနိန်ဖို.လို. မပြောနိုင်။ တစ်ချိန်ချိန်မှာ ဒုခတွီ.နိုင်ရေတဲ. ဟုတ်တေ မှန်ရေ။ လက်တွီ.ကြုံပလိုက်ဗျာလ်ကို။
တစ်ခါတစ်ခါ လူတိကလဲတစ်မျိုး သူ.ကိုခင်လို.ရာ ကိုယ်.ဘ၀အကြောင်းကို ဖွင်.ပြောမိကေ။ တစ်မျိုးထင်လားတတ်တေ အထာပီးရေ ဆိုပြီးကေ။ ယင်းပိုင်လူတိလဲ ရှိကတ်တေ။ ယင်းနဲ.လို.နောက်ခါဆိုကေ ဒိုင်ယာရီမှာ ရွီးစွာစော် အကောင်းဆုံးယာ ဆိုစွာကိုနားလည်လာရေ။
ပန်းခြံမှာ တစ်ယောက်တည်း တေးခြင်းနားထောင်ရေ အရသာကိုကြိုက်ပါလတ်တေ။ ဒေမှာက မြန်မာနိုင်ငံပိုင်က မဟုတ်။ အိမ်နားတိုင်းမှာ ပန်းခြံရှိရေတွက် ဇာအချိန်ပင် လားထိုင်လားထိုင် အန္ဒာရယ်မရှိ။ တစ်ခါမှတ်မိသိရေ ညဉ်.ခါ ဆယ်နာရီလောက်မှာ ပန်းခြံမှာထိုင်နိန်စွာ(အလုပ်က အိမ်ကို ရှစ်နာရီဆိုကေ ရောက်တေ အိမ်မပြန်ဘဲနဲ. အိမ်နားကပန်းခြံမှာထိုင်နိန်စွာ) သူငယ်ချင်းက ဖုန်းဆက်တေ "နင်.ဇာမှာလေလတ် နန်းစံက ပန်းခြံမှာထိုင်နိန်ရေလို. သူပြောရေ နင်သိလာ ဒေမှာလေ သရဲပေါရေဆိုဝေါ (နန်းစံလဲ သရဲဆိုကေ အချေကပင်ကြောက်စွာ )ဘေးနားကိုကြည်.လိုက်တေခါ လူတစ်ယောက်လဲမရှိ နန်းစံတစ်ယောက်တည်းဆိုစွာကို သိလားရေ။ ယကေ ဇာရဖို.လဲ ဖိနပ်တောင်မစီးနိုင် ဖိနပ်ကိုင်ပြီးကေ ထလို.ပြီးစွာတစ်ခု ကောင်းကောင်းမှတ်မိရေ "
အလုပ်ကပြန်လာကေ ကွန်ပျုတာမသုံး မျက်လုံးကိုက်တေ ရုံးမှာလဲ ကွန်ပျုတာကြည်. တရက်လုံးလို. ဇာလောက်ပင် ဆုံးဖြတ်ဆုံးဖြတ်။ အိမ်ကိုရောက်ကေ လွယ်ရေ အိတ်ကိုတောင်မချနိုင် ကွန်ပျုတာကို တန်းပနာဖွင်.ပြီးကေ အနည်းဆုံး ညဉ်.တစ်နာရီလောက်ထိ ကြည်.ရေ အကျင်.ဆိုးတိ ရပါလတ်တေ။ အင်္ဂလိပ်စာညံရေ စာဖတ်ရဖို. ဆိုပြီးကေ youtube ကတေးခြင်းတိကိုရောက်လားကေ စာနဲ.အ၀ီးကြီး အမြဲတမ်းဖြစ်ပါလတ်တေ။
အော်ဒေမကောင်းရေ အကျင်.ဆိုးတိ ဘဇောင်ခါပျောက်ဖို.လဲ။ သိရေ ကိုယ်.စွာကိုလဲ ဒေအကျင်.တိကိုဖျောက်မှ ရဖို.မဟုတ်ကေတော. လားဗျာလ်ဆိုစွာကို။ ပြင်ဖို.ကြိုးစားတုန်းလို. ပြောကောင်းတုန်း။
လာဖတ်ပါရေး)
ReplyDelete