" အမင် " လို့ခေါ်ကြည့်ရေလောက်ကပင် ပူလောင်နိန်ရေ စိတ်တိငြိမ်းချမ်းလားခရေ။ အသက်ထွက်လောက်အောင် နာကြင်မှုဒဏ်ကို ခံပြီးမှ မွီးဖွါးပီးလိုက်တေ အကျွန့်ရို့တိအမင်။ ထမင်းမစားချင်ကေ စားအောင်လို့ ထမင်းဆီဆမ်း၊ ရွှေလင်းပန်းနဲ့ တေးခြင်းကိုဆိုပနာ ကျွေးခရေ စိတ်ရှည်သီးခံမှုတိနဲ့ အမင်။ ဖေ့ချာဇာလောက်ပင် အဆင်မပြေပါတ်စီ သားသမီးတိကို ထမင်းနှစ်ထပ် နပ်မှန်အောင်ကျွေးခရေ ကြီးမားရေ မိတ္တာတိနဲ့ အမင်။ ရင်သွီးချေတိ ဇာလိုချင်လဲ အရိပ်ပြစရာမလိုဘဲ တပ်အပ်သိနိန်စွာက ဇာသူဟိဖို့လဲ။ သားသမီးတိ လိုအပ်နိန်ကေ မရ,ရရေပိုင် ကြံပနာ ရှာပီးတတ်တေ အကျွန့်ရို့တိ အမင်။ ခါးနာနိန်ကေတောင် မနာဟန်ဆောင်ပြီးကေ ၀မ်းရေးအတွက် ဆက်ရုန်းနိန်သိ့ရေ အမင်။ အမင့်ခံစားချက်တိကို ကိုယ်က အမင်ဖြစ်မှနားလည်စရာမလို။ နားလည်လာဗျာလ် အမင်။
ကိုယ့်ရင်သွီးတိ အနားမှာမဟိကေ အသည်းနှလုံးကို ထုတ်ပလိုက်စွာထက် ပိုနာကြင်ရေဆိုရေအမင်။ အမင်မငိုပါကဲ့။ နောက်တချိန်မှာ အမင့်နားမှာ အပြီးနိန်ဖို့ ဒေဂုတချက်ချေ သည်းခံလိုက်ပါ။ တခါတလီ လောကကြီးမှာ ရပ်တည်ရစွာ ညောင်းပါလတ်တေ အမင်။ အမင့်ရင်ခွင်မှာ ဟန်မဆောင်ဘဲနဲ့ အီးအီးချမ်းချမ်းနိန်ခရေ အချိန်တိကို ကမ္ဘာလောက်အောက်မိန့်ရေ။ အိုလီ၊ လှလီ၊ ဟောင်းလီ၊ တန်ဖိုးဟိလီ ဆိုစွာ အမင့်မိတ္တာကို ပြောစွာရာမနား။ အမင်မဟိကေ မဖြစ်ဆိုစွာ ၀ီးမှသိပါလတ်တေ။ အမင့်တန်ဖိုး ၀ီးမှပိုနားလည်လာရေ။ ဇာလောက်ပင် အသက်ကြီးလာပါတ်စီ အမင့်အရိပ်ရောက်ကေ အချေတိပိုင် ခံစားရရေ။ ဆိုးဝါးကြမ်းတမ်းရေ လောကဓံတိ ထိုးနှက်ချက်ကြောင့် စိတ်ဓါတ်တိကျဆင်းခကေတောင် အားမလျှော့ဘဲနဲ့ အမင်ကြံ့ကြံ့ခံ ရင်ဆိုင်နိုင်ရေ။
အမင့်ဆံပင်တိ ဖြူပါလတ်ဗျာလ်။ ဒေအသက်အရွယ် ရောက်နိန်ဗျာလ် အမင့်ကို စိတ်ချမ်းသာအောင်မထားနိုင်သိကာလို့ စိုင်းစားလိုက်တိုင်း ကိုယ့်စွာကိုယ် မုန်းမိရေ။ ၀မ်းရေးအတွက် အမင်ပူပန်နိန်ရတုန်းသိမ့်။ ညည့်အိပ်တေ အချိန်တိုင်း အမင့်သက်ပြင်းသံ တတိုးချေတိကို နိန့်တိုင်းကြားနိန်ခရေ။ " ဇာပြသာနာပင်လာလာ ကောင်းမစိုင်းစား, မပူပန်ကဲ့ အချိန်တန်ကေ သူ့အလိုလို ပြီးလားလိမ့်မယ် " လို့ အမင့်ကို နှစ်သိမ့်ခရေ စကားတခွန်း ဒေဂု ကိုယ့်စွာကိုယ် ပြန်ပနာပြောနိန်ရဗျာလ် အမင်။
ငါ့သား၊ သမီးတိကို ငါ့ထက်တောင်အောင်လုပ်ဖို့ဆိုရေ အမင့်သန္ဓိဌာန်နဲ့ စွမ်းအားကို လေးစားမိရေ။ မြင့်မိုရ်ဆိုရေ ဒေတောင်၊ ဒေတာဝန်ကို အမင့်ပခုံးတစ်ဖက်တည်းနဲ့ ကြည်ကြည်ဖြူဖြူ လိုလိုလားလား ထမ်းခရေ အမင့်ကို ဇာနဲ့ဆပ်ကေ နို့ဖို့ကျီဖို့လဲ။ အချေခါငိုတိုင်း လမင်းကြီးကို လက်ညိုးထိုးပြပြီးကေ တေးခြင်းနဲ့ ချော့ပနာ အငိုတိတ်အောင် အမင်လုပ်ခရေ။ ယင်းခါမြင်ရရေ လမင်းက အဂုမြင်နိန်ရစွာထက် ပိုကြီးပြီးကေ ပိုအီးချမ်းနိန်ခရေကာ အမင်။ မဟုတ်ဘဲနဲ့ ဒေသမီးမျက်လုံးမှာ သောကတိမ်တိရာ ဖုံးနိန်လို့လား အမင်။
Immigration Counter ကို ၀င်ရေအချိန်ထိ စိတ်မချဘဲ အမင် တစ်ခုပြီး တစ်ခု မှာနိန်ခရေ။ ဆက်သွယ်ရခက်တေ မြို့ချေတစ်မြို့က ဖုန်းဆိုင်ထဲမှာထိုင်ပနာ အမင် ဇာလောက်စိတ်ပူပန်နိန်ဖို့ ဆိုစွာကို မှန်းဆမိပါယင့်။ " ဖြစ်နိုင်ကေ ငါရာနိုင်ငံခြားကို လားပနာ လုပ်ချင်စွာလုပ်ရ လုပ်ပလိုက်ချင်ရေ၊ ငါ့သမီးချေကို လွှတ်ရစွာ ရင်တိပူပနာ ရူးဖို့ပိုင်တွီ့ရေ " လို့ မျက်ရည်တိနဲ့ ပြောခရေ အမင့်စကားတခွန်း နားထဲမှာ အဂုထက်တိ ကြားယောင်မိတုန်းအမင်။ ဘ၀ဆိုစွာ ဒေပိုင်ဗျာလ် အမင်။ အားလုံးသူက ကိုယ့်ဒုက္ခနဲ့ကိုယ် ဇာသူတစ်ယောက် အီးအီးချမ်းချမ်း နိန်နိုင်ကတ်လေ။ တစ်ခုခုတော့ ပူပန်နိန်ရစွာဗျာလ်။ တခါတလီ အမင့်ပိုင် ရင့်ကျက်တေ မ,မတစ်ယောက်ဖြစ်ချင်ရေ။ အသက်ရာ၂၀ ကျော်ပါလတ်တေ မရင့်ကျက်နိုင်သိ့ပါကာ။ ကိုယ့်စွာကို ကံကောင်းသိမ့်ရေလို့ ထင်မိယင့်။ အချိန်မရွီး တန်းခါးဖွင့်ထားရေ အိမ်ချေမှာ သမီးပြန်အလာကို စောင့်မျှော်နိန်ရေ အမင်ဟိရေ။ မလိုဗျာလ်..... အရာတစ်ခုလဲ မလိုအပ်ဗျာလ်.....
သမီးကိုကြည့်ရေ အမင့်အပြုံးမျက်နှာ မျက်လုံးမှာ မျက်ရည်တိနဲ့ကာ။ မွီးရပ်မြီက ထွက်လာရေအချိန်မှာ မြင်ခရရေ အမင့်ပုံရိပ် နှလုံးသားမှာ စွဲထင်နလီယင့်။ အမြင်က ပျောက်လားအောင်ထိ ဆိပ်ကမ်းမှာ ရပ်ပနာကျန်ဟိခရေ ဒေမြင်ကွင်းကို မိန့်နိုင်ဖို့ ထင်လားအမင်။ ဖုန်းဆက်ရေအချိန်တိုင်း နိန်လို့ကောင်းရေ၊ အဆင်ပြေရေလို့၊ အမင်စိတ်ချမ်းသာအောင် စကားကိုအလှပချေ ဟန်ဆောင်ပနာ သမီးပြောတတ်နိန်ဗျာလ်။ အိမ်နဲ့ဝီးရေ လူတိုင်း အိမ်ကိုလွမ်းပါရေ အမင်။ ခေါင်းထက်က ပျံနိန်ရေ လေယာဉ်တစ်စင်းထက်မှာ ဇာနိန့် ကိုယ်လိုက်ရဖို့လဲဆိုစွာကို နိန့်တိုင်းစောင့်မျှော်နိန်မိရေ။ လောကကြီးကို ရင်ဆိုင်ခရေ အားကောင်းမောင်းသန် အမင့်ခွန်အားတိကို အားကျမိပါယင့်။ အမင့်တွက်ဆိုကေ ခလုတ်တိုက်စွာလောက်ရာဟိ့ရေ ပြသာနာချေတိကို ရင်ဆိုင်ရကေတောင် မျက်ရည်အရင်ဝဲလာရေ ကိုယ့်စွာကိုယ်လဲအားမရ။
ဒေအကွေ့အကောက်များရေ လူ့လောကကို အကြောက်အရွံ မဟိ ရဲရဲဝံ့ဝံ့ ရင်ဆိုင်ခရေ အမင့်သတ္တိနဲ့ခွန်အားကို လေးစားမိရေ။ " ကမ္ဘာကြီးကို အာဒံနန့် ဧ၀ ကပင်စခရေလို့ပြောပြော၊ ဗြာဟ္မာကြီးလေးရပ်ကပင် စခရေလို့ပြောပြော အကျွန်ရို့တိ ဒေပိုင်အသက်ရှင်နိန်စွာ အမင့် ကျေးဇူးကြောင့်ပါဗျာလ်၊ နားနန့်မနာ ဖ၀ါးနန့်နာ၊ ကိုယ့်မျက်စိအောက်မှာ အမင်ဆိုစွာ မ,မပျက် မကောင်းရေ မ,မဖြစ်နိန်လီပါတ်စီ အမင်က အမင်ဗျာလ် " လို့ ဆရာကြီးတစ်ယောက်ကတောင် ဖော်ပြခလီယင့် အမင်။ အမင်မှန်ကေ ဘာသာခြား လူမျိုးခြားမဟုတ် သားသည်အမိတစ်ယောက်စွာ အမင်ဗျာလ်။ အမင်မှန်ကေ တိရစ္ဆာန်ဖြစ်တေ ခွီးတောင် နွီးထွီးရေ အမင့်စိတ်ဓါတ်ဟိရေ။ ခွီးသားပေါက်ချေတိကို နို့တိုက်ချင်လို့ လမ်းဘေးမှာ ဟိုလူခလုံးကျောက်၊ ဒေလူခလုံးကျောက်နဲ့ သူ့ခမျာ အစာရာရရေ။ အသိဥာဏ်မဟိရေ ခွီးတောင် သား၊ သမီးနဲ့ ပက်သက်လာကေ ဇာဒုက္ခ ဇာနာကြင်မှု ကြုံရပါတ်စီ ရင်ဆိုင်ရေ။ ကြီးမားရေ မိတ္တာနဲ့ မိခင်စိတ်ဓါတ် ဇာလောက်လေးစားဖို့ကောင်းလေ။ ဘ၀ကို တက်တစ်ခါ ကျတစ်လှည့် စိတ်ဓါတ်နဲ့ ဖြတ်သန်းယင်း အင့်အိမ်ချေကိုလည်း လွမ်းမိယင့် အမင်။
အိမ်နဲ့ဝီးရေလူတိုင်း တစ်နှစ်တစ်ခါ အိမ်ကိုပြန်စီချင်ပါရေ။ ဖေ့ချာ အဆင်မပြေလို့ ဇာလောက်ပင်ပြောပြော၊ ကိုယ့်မိသားစုနဲ့ ဒေမှာ အခြေကျနိန်ဗျာလ်လို့ပြောပြော၊ သားသမီးတိမျက်နှာကို မြင်ချင်ရေ တတူနိန်ချင်ရေ အမင် အကျွန့်ရို့ထားပခရေ အိမ်ဟောင်းချေမှာ စောင့်မျှော်နိန်ပါရေ။ သောကကိုဖုံးပနာ ပူဆွေးမှုတိကို ကြိတ်မျိုချလို့ ကိုယ့်ဆန္ဒကို ဖော်မပြတတ်ဘဲ သားသမီးစိတ်ချမ်းသာဖို့ရာ ဦးစားပီးတတ်ခရေ အကျွန့်ရို့တိ အမင်။ ဘုရားရှီးခိုးတိုင်း အမင့်ကြေးစည်သံနန့် တတူ သား၊သမီးတိတွက် ဆုတောင်း မိတ္တာပို့သံကို ကြားယောင်နိန်မိယင့် အမင်။ တစ်နှစ် တစ်ခေါက် ပြန်ကေတောင် အမင်နဲ့တွီ့ဖို့ရက်ကို လက်ချိုးရွီလို့ ရပါရေ။ အကျွန်ရို့တောင် ဒေအသက်အရွယ်ကို ရောက်နိန်ဗျာလ်ဆိုကေ ဘ၀မှာ အမင်ဇာလောက် တာရှည်နိန်နိုင်ဖို့သိမ့်လဲ။ ဒေလောကမှာ နှစ်ယောက်မရှိ၊ အစားထိုး မရနိုင်ရေ အမင် အကျွန့်ရို့တိ အိမ်ပြန်လမ်းကို မျှော်နိန်စွာကို သတိရစီချင်ပါရေ။
အမင့်ကျေးဇူးကို သိရေလူ အစစ အရာရာ အဆင်ပြေပြီးကေ အိုတောင်မဆင်းရဲစွာ အမှန်ပါ။ ဇာပင်လုပ်လုပ် အမင့်အတွက်ဆိုရေ ဒေကုသိုလ်စိတ်ချေကပင် ကူညီဖို့လူတိ ပေါ်ပါလတ်စွာကို လက်တွီ့ကျင့်သုံးကေ သိလာပါလိမ့်မေ။ ရီစုန်ရာ ဟိပြီးကေ ရီဆန်မဟိရေ မိတ္တာကို အမင်ကလွဲပြီးကေ ဇာသူပီးနိုင်ပါလေ။ အလား အလာဆိုရေစကား အမင်တိအတွက်မမှန်။ အလားရာဟိပနာ အလာမဟိရေ ဂရုဏာ အကျွန့်ရို့တိကို ဇာသူပီးနိုင်ပါလေ။ မျှော်လင့်ခြင်းမဟိရေ ပီးဆပ်မှုတိနဲ့ ဒေလောက, က အမင်အားလုံး စိတ်ချမ်းသာ၊ ကိုယ်ကျန်းမာ ပြီးကေ ရင်ထဲကအပူတိ ငြိမ်းအီးနိုင်ပါစီလို့ သားသမီးတိ အားလုံးကိုယ်စား ဆုတောင်းမိတ္တာ ပို့သလိုက်ပါရေ။
- အ၀ီးတစ်နိန်ရာက အမင့်ကို ဒေဆောင်ပါးချေနန့် သမီးရှီခိုးလိုက်ပါရေ.....
No comments:
Post a Comment